తమిళ హీరో శింబు కారు ఢీకొని గాయపడిన వృద్ధుడు చికిత్స పొందుతూ మృతి

ఈ నెల 18న చెన్నైలో తమిళ హీరో శింబు కారు ఢీకొని ఓ వృద్ధుడు తీవ్రంగా గాయపడ్డాడు. ఆ సమయంలో కారులో శింబు తండ్రి టి.రాజేంద్రన్ ఉన్నారు. తన కుమారుడికి చెందిన వాహనంలో ఆసుపత్రికి వెళ్లి వస్తుండగా, రోడ్డు పక్కన ఉన్న దివ్యాంగుడైన వృద్ధుడిని ఆ కారు ఢీకొట్టింది. 

వెంటనే అంబులెన్స్ కు సమాచారం అందించిన టి.రాజేంద్రన్ ఆ వృద్ధుడిని ఆసుపత్రికి తరలించారు. ప్రమాదానికి కారకుడైన కారు డ్రైవర్ ను కూడా వృద్ధుడి వెంట ఆసుపత్రికి పంపించారు. అప్పటి నుంచి చికిత్స పొందుతున్న ఆ వృద్ధుడు... పరిస్థితి విషమించడంతో నిన్న కన్నుమూశారు. ప్రమాదానికి కారకుడైన శింబు కారు డ్రైవర్ ను పోలీసులు అరెస్ట్ చేశారు. కాగా, ఈ రోడ్డు ప్రమాదం దృశ్యాలు సీసీటీవీ కెమెరాల్లో రికార్డయ్యాయి.