అంచనాలు పెంచుతున్న కమల్ 'విక్రమ్'!

కమల్ కథానాయకుడిగా 'విక్రమ్' సినిమా రూపొందుతోంది. లోకేశ్ కనగరాజ్ ఈ సినిమాకి దర్శకత్వం వహిస్తున్నాడు. ఈ సినిమా నుంచి వదిలిన కాన్సెప్ట్ వీడియో ఒక రేంజ్ లో జనంలో ఆసక్తిని రేకెత్తించింది. కరోనా కారణంగా కాస్త ఆలస్యంగానే ఈ సినిమా సెట్స్ పైకి వెళ్లింది. ప్రస్తుతం ఈ సినిమా షూటింగు జోరుగా జరుగుతోంది. భారీ బడ్జెట్ తో కమల్ తన సొంత బ్యానర్ పై నిర్మిస్తున్న ఈ సినిమాలో, ఆయన కొంతసేపు అంధుడిగా కనిపించనున్నాడని అంటున్నారు. ఆ ఎపిసోడ్స్ ఈ సినిమాకి హైలైట్ గా నిలుస్తాయని చెబుతున్నారు.

మొదటి నుంచి కూడా కమల్ ప్రయోగాత్మక పాత్రలకు కేరాఫ్ అడ్రెస్ గా నిలుస్తూ వచ్చారు. అలాగే ఈ సినిమా కూడా ఒక ప్రయోగమేనని అంటున్నారు. విజయ్ సేతుపతి .. ఫాహద్ ఫాజిల్ .. నరేన్ .. అర్జున్ దాస్ ఈ సినిమాలో కీలకమైన పాత్రలను పోషిస్తున్నారు. అనిరుధ్ సంగీతాన్ని అందిస్తున్నాడు. వరుసగా వైవిధ్యభరితమైన కథలను తెరకెక్కిస్తూ వస్తున్న లోకేశ్ కనగరాజ్ నుంచి వస్తున్న సినిమా కావడంతో, సహజంగానే అంచనాలు భారీగా ఉన్నాయి. ఆ అంచనాలను ఈ సినిమా ఎంతవరకూ అందుకుంటుందో చూడాలి. వచ్చే ఏడాదిలో ఈ సినిమా ప్రేక్షకుల ముందుకు రానుంది.