Renu Desai: అకీరా ఎంట్రీపై స్పందించిన రేణు దేశాయ్!

రేణు దేశాయ్ కి కథ .. స్క్రీన్ ప్లే .. దర్శకత్వం .. ఎడిటింగ్ పై మంచి అవగాహన ఉంది. దర్శక నిర్మాతగా ఆమె మరాఠీ సినిమాలతో బిజీగా ఉన్నారు. త్వరలో తెలుగులోను ఒక సినిమాకి దర్శకత్వం వహించాలనే ఉద్దేశంతో ఒక కథను సిద్ధం చేసుకుంటున్నట్టుగా ఆ మధ్య ఆమె చెప్పారు. తనకి సంబంధించిన .. తన సినిమాలకి సంబంధించిన విషయాలను ఆమె ఎప్పటికప్పుడు అభిమానులతో పంచుకుంటూ ఉంటారు. అలా తాజాగా ఆమె అభిమానులతో లైవ్ లో మాట్లాడారు. వాళ్లు అడిగిన అనేక ప్రశ్నలకు తనదైన శైలిలో సమాధానాలు ఇచ్చారు.

మెగా ఫ్యామిలీకి సంబంధించిన కుర్రాళ్లంతా ఒక్కొక్కరిగా తెరకి పరిచయమవుతున్నారు. అకీరా ఎంట్రీ కోసం పవన్ అభిమానులంతా ఎంతో ఆత్రుతగా ఎదురుచూస్తున్నారు. అందువలన వాళ్లు టాలీవుడ్ తెరపైకి జూనియర్ పవర్ స్టార్ ఎంట్రీ ఎప్పుడనే విషయాన్ని అడిగారు.

"ఒక వైపున కరోనా విజృంభిస్తోంది .. దాని బారినపడి ఎంతోమంది ప్రాణాలను పోగొట్టుకుంటున్నారు. ఎవరి ప్రాణాలను కాపాడుకునే ప్రయత్నంలో వాళ్లు ఉన్నారు. ఇలాంటి పరిస్థితుల్లో హీరోగా అకీరా ఎంట్రీ గురించి మాట్లాడుకోవడానికి ఇది సరైన సమయం కాదు" అని ఆమె సమాధానం ఇచ్చారు.