Pavan kalyan: 'వకీల్ సాబ్' దెబ్బకి అందరిచూపూ ఆ రీమేక్ వైపే!

పవన్ కల్యాణ్ కథనాయకుడిగా ఇటీవల 'వకీల్ సాబ్' ప్రేక్షకుల ముందుకు వచ్చింది. వేణు శ్రీరామ్ దర్శకత్వం వహించిన ఈ సినిమా, విడుదలైన ప్రతి ప్రాంతంలో విజయవిహారం చేస్తోంది. పవన్ కల్యాణ్ ఈ సినిమాతో రీ ఎంట్రీ ఇవ్వాలని నిర్ణయించుకున్నప్పుడు అభిమానులు టెన్షన్ పడ్డారు. పెద్దగా ఎంటర్టైన్మెంట్ లేని ఈ కథ, పవన్ రీ ఎంట్రీకి తగిన కథ కాదనే అభిప్రాయాలను వ్యక్తం చేశారు. కానీ ఇప్పుడు ఈ సినిమా తెలుగు రాష్ట్రాల్లోనే కాదు .. ఓవర్సీస్ లోను రికార్డుస్థాయి వసూళ్లతో దూసుకుపోతోంది.

'వకీల్ సాబ్' హిందీలో భారీ విజయాన్ని సాధించిన 'పింక్' సినిమాకి రీమేక్. ఈ సినిమా భారీ విజయాన్ని సాధించడంతో, పవన్ తదుపరి సినిమా అయిన 'అయ్యప్పనుమ్ కోషియుమ్' రీమేక్ పై అందరి దృష్టి నిలిచింది. ఇది మలయాళంలో సంచలన విజయాన్ని సాధించిన సినిమా. తెలుగులో సాగర్ కె చంద్ర ఈ సినిమాకి దర్శకత్వం వహిస్తున్నాడు. తెలుగు నేటివిటీకి తగినట్టుగా మార్పులు చేర్పులు చేసుకుని ఆయన రంగంలోకి దిగాడు. రెండు బలమైన పాత్రల మధ్య జరిగే ఘర్షణ ఈ సినిమా. మరో ప్రధానమైన పాత్రను రానా చేస్తున్నాడు. ఆయన క్రేజ్ కూడా ఈ ప్రాజక్టుకు యాడ్ కానుంది. ఈ  ఏడాదిలోనే విడుదల కానున్న ఈ సినిమాపై అందరిలోనూ ఆసక్తి ఉంది.