'అన్నమయ్య' సినిమాను చూడటానికి థియేటర్ కి వెళితే నా కాళ్లకు నమస్కరించారు: హీరో సుమన్

సుమన్ యాక్షన్ సినిమాలతో పాటు పలు కుటుంబ కథా చిత్రాల్లోనూ నటించారు. ఆ తరువాత ఆయన భక్తిరస చిత్రాల్లోను మెప్పించారు. ఆ తరహా సినిమాల్లో 'అన్నమయ్య' అగ్రస్థానంలో నిలుస్తుంది. ఆ సినిమాను గురించి 'అలీతో సరదాగా' కార్యక్రమంలో సుమన్ మాట్లాడారు.

'అన్నమయ్య' సినిమాలో వేంకటేశ్వరస్వామి పాత్ర కోసం నియమ నిష్టలు పాటించాను. ఈ సినిమా ప్రివ్యూ చూడటానికి నేను హైదరాబాదులోని 'దేవీ' థియేటర్ కి వెళ్లాను. ఆ సినిమా చూస్తూనే నేను ఆడియన్స్ ను చూస్తే.. వాళ్లు కన్నీళ్లు తుడుచుకోవడం గమనించాను. సినిమా పూర్తయిన తరువాత కామెంట్స్ వినడం కోసం నేను కాసేపు అక్కడ వెయిట్ చేశాను. ఆ సమయంలో వయసులో నాకంటే పెద్దవారు కూడా వచ్చి నా కాళ్లకు నమస్కరించడం చూసి నేను ఆశ్చర్యపోయాను. అంతటి గొప్ప పాత్రను పోషించే అవకాశం కలగడం నా అదృష్టంగా భావిస్తున్నాను" అని చెప్పుకొచ్చారు.