ఎన్టీఆర్ .. ఏఎన్నార్ లేకపోయినా హిట్లు కొట్టడం నా వల్లనే అయింది: సీనియర్ హీరోయిన్ జమున

తెలుగు తెరపై ఆంధ్రా డ్రీమ్ గాళ్ గా జమున ఒక వెలుగు వెలిగారు. అలాంటి జమున ఎన్టీఆర్ .. ఏఎన్నార్ లతో కలిసి మూడేళ్లపాటు నటించలేదు. తాజా ఇంటర్వ్యూలో ఆ విషయాన్ని గురించి జమున మాట్లాడుతూ, "ప్రతి స్త్రీ తన వ్యక్తిత్వాన్నీ .. ఆత్మాభిమానాన్ని కాపాడుకోవాలనుకుంటుంది. అలాంటి ధోరణిని కొంతమంది మగవాళ్లు సహించలేరు. అయినా వాళ్లను ఎదుర్కునే గుండె ధైర్యం ఆ స్త్రీకి ఉండాలి.

ఆ ధైర్యంతోనే కెరియర్ పరంగా నేను ముందుకు సాగాను. ఆ మూడేళ్లలో జగ్గయ్య .. హరనాథ్ వంటి హీరోలతో నేను నటించాను. మొత్తంగా చూసుకుంటే ఆ సమయంలో నేను 18 నుంచి 20 సినిమాలు చేశాను. వాటిలో 15 సినిమాలు హిట్ అయ్యాయి. ఎన్టీఆర్ .. ఏఎన్నార్ లేకున్నా జమున ఇన్ని హిట్లు కొట్టేసి నిలబడగలగడం గొప్ప విషయమని అప్పట్లో అంతా చెప్పుకున్నారు" అంటూ జమున అన్నారు.