ప్రియాంక చోప్రా సినిమాలో ఆలియాభ‌ట్‌?

అంత‌ర్జాతీయ న‌టిగా గుర్తింపు పొందిన ప్రియాంక చోప్రా, బాలీవుడ్‌లో పెద్ద‌గా సినిమాల్లో న‌టించ‌డం లేదు. అయినప్ప‌టికీ కొన్ని సినిమాల‌ను నిర్మించాల‌ని యోచిస్తోంది. అందులో భాగంగానే భార‌త్ విచ్చేసిన ప్ర‌తిసారీ త‌న సినిమాల్లో న‌టించే హీరోయిన్ల కోసం వెతుకుతోంది. ఈ నేప‌థ్యంలో తాను పిల్ల‌లు, వీధికుక్క‌ల క‌థాంశంతో నిర్మించ‌బోయే సినిమాలో న‌టించాల‌ని చాలా మంది హీరోయిన్ల‌ను అడిగింద‌ట‌. అయితే వారంతా ప్రియాంక‌కి నో చెప్పేశార‌ట‌.  

ఈ నేపథ్యంలో ఇటీవ‌ల భార‌త్ వ‌చ్చిన‌పుడు ఇదే క‌థ‌ను ఆలియాభ‌ట్‌కి వివ‌రించి, ఆ చిత్రంలో న‌టించాల‌ని ప్రియాంక ఆమెను కోరింద‌ట‌. స్వ‌త‌హాగా జంతువులంటే అమిత‌మైన ప్రేమ చూపించే ఆలియాభ‌ట్ ఈ చిత్రంలో న‌టించేందుకు ఆసక్తి చూపిన‌ట్లు తెలుస్తోంది. అయితే దీని గురించి ప్రియాంక గానీ, ఆలియా గానీ అధికారికంగా ఎలాంటి విష‌యాన్ని వెల్ల‌డించలేదు.