పసిడి ప్రియులకు మళ్లీ షాక్.. స్వల్పంగా పెరిగిన బంగారం ధరలు

గత కొన్ని రోజులుగా తగ్గుతూ వస్తున్న పసిడి ధరలు నేడు స్వల్పంగా పుంజుకున్నాయి. మంగళవారం ఉదయం నాటికి దేశీయ మార్కెట్లలో బంగారం ధరలు పెరగగా, వెండి ధర మాత్రం స్వల్పంగా క్షీణించింది. తెలుగు రాష్ట్రాల్లోని ప్రధాన నగరాలైన హైదరాబాద్, విజయవాడల్లో నేటి ధరల వివరాలు ఇలా ఉన్నాయి.

హైదరాబాద్ మార్కెట్లో 10 గ్రాముల 24 క్యారెట్ల బంగారం ధర రూ. 1,44,610గా ఉండగా, 22 క్యారెట్ల పసిడి ధర రూ. 1,32,560 వద్ద కొనసాగుతోంది. ఇక 18 క్యారెట్ల బంగారం ధర రూ. 1,08,460 వద్ద నమోదైంది. ఆంధ్రప్రదేశ్, తెలంగాణ రాష్ట్రాల్లోని ఇతర ప్రధాన నగరాలైన వరంగల్, విశాఖపట్నం, తిరుపతి, కాకినాడ, నిజామాబాద్, ఖమ్మంలలో కూడా ఇవే ధరలు అమలవుతున్నాయి.

దేశంలోని ఇతర మెట్రో నగరాలతో పోలిస్తే జాతీయ రాజధాని ఢిల్లీలో బంగారం ధరలు అత్యధికంగా ఉన్నాయి. ఢిల్లీలో 10 గ్రాముల 22 క్యారెట్ల బంగారం ధర రూ. 1,32,710గా పలుకుతోంది. ముంబై, కోల్‌కతా, పుణే నగరాలతో పాటు కేరళ రాష్ట్రంలోనూ హైదరాబాద్‌కు సమానంగా ధరలు ఉండగా, చెన్నై మార్కెట్లో మాత్రం ధరల్లో స్వల్ప వ్యత్యాసం కనిపిస్తోంది.

మరోవైపు వెండి ధర కిలోపై సుమారు రూ. 100 మేర తగ్గింది. ప్రస్తుతం హైదరాబాద్, విజయవాడ మార్కెట్లలో కిలో వెండి ధర రూ. 2,04,900గా ఉంది. అంతర్జాతీయ పరిణామాలు, డాలర్ విలువలో హెచ్చుతగ్గులు, స్థానిక పన్నుల ప్రభావంతో బంగారం, వెండి ధరల్లో నిత్యం మార్పులు చోటు చేసుకుంటాయని, కొనుగోలుదారులు తాజా ధరలను ఒకసారి సరిచూసుకోవాలని నిపుణులు సూచిస్తున్నారు.