జీడీ నెల్లూరులో అధికార కూటమికి షాక్.. పలుచోట్ల వైసీపీ విజయం

రాష్ట్రవ్యాప్తంగా పరిషత్ ఎన్నికల కౌంటింగ్‌లో అధికార టీడీపీ-జనసేన కూటమి హవా కొనసాగిస్తుండగా, చిత్తూరు జిల్లా గంగాధర నెల్లూరు (జీడీ నెల్లూరు) నియోజకవర్గంలో మాత్రం కూటమికి చుక్కెదురైంది. పలు జడ్పీటీసీ, ఎంపీటీసీ స్థానాలను వైఎస్ఆర్ కాంగ్రెస్ పార్టీ కైవసం చేసుకుని అధికార కూటమికి గట్టి షాక్ ఇచ్చింది. ముఖ్యంగా స్థానిక టీడీపీ ఎమ్మెల్యే థామస్ సొంత మండలంలోనే కూటమి అభ్యర్థి ఓడిపోవడం చర్చనీయాంశంగా మారింది.

ఎమ్మెల్యే థామస్ సొంత మండలమైన కార్వేటినగరంలో జెడ్పీటీసీ స్థానానికి జరిగిన ఎన్నికలో వైసీపీ అభ్యర్థి జగదీశ్ రెడ్డి విజయం సాధించారు. ఇక్కడ పోటీ చేసిన జనసేన అభ్యర్థి బాలాజీ రెడ్డి ఓటమి పాలయ్యారు. దీంతో పాటు వెదురుకుప్పం, ఎస్.ఆర్.పురం మండలాల్లోని జడ్పీటీసీ స్థానాలను కూడా వైసీపీనే గెలుచుకుంది. ఎస్.ఆర్.పురం, వెదురుకుప్పం, పెనుమూరు మండలాల్లో అత్యధిక ఎంపీటీసీ స్థానాలు కూడా వైసీపీ ఖాతాలోకే వెళ్లాయి.

స్థానిక ఎమ్మెల్యే పనితీరుపై టీడీపీ కేడర్‌లో ఉన్న అసంతృప్తి, మండలాల కేటాయింపులో గందరగోళం, వైసీపీ నుంచి వచ్చిన నేతలకు అధిక ప్రాధాన్యం ఇవ్వడం వంటి కారణాలతోనే ఈ ఫలితాలు వెలువడినట్లు స్థానిక వర్గాలు విశ్లేషిస్తున్నాయి. ఈ పరిణామాలు కూటమిలో అంతర్గత చర్చకు దారితీశాయి.

అయితే, కొన్నిచోట్ల కూటమి ఊరట పొందింది. గంగాధర నెల్లూరు జడ్పీటీసీ స్థానాన్ని టీడీపీ అభ్యర్థి యేసుమణి కేవలం 304 ఓట్ల స్వల్ప మెజారిటీతో గెలుచుకున్నారు. పలసముద్రం జడ్పీటీసీ స్థానంలో టీడీపీ అభ్యర్థి జాహ్నవి 2,737 ఓట్ల ఆధిక్యంతో ఘన విజయం సాధించారు. పెనుమూరు జడ్పీటీసీ ఫలితం మాత్రం ఇంకా వెలువడాల్సి ఉంది.

ఒక్క గంగాధర నెల్లూరులో ప్రతికూల ఫలితాలు ఎదురైనప్పటికీ, రాష్ట్రంలోని మెజారిటీ జిల్లాల్లో మాత్రం కూటమి అభ్యర్థులే ఆధిక్యంలో కొనసాగుతున్నారు. ఇదే సమయంలో, రాష్ట్రవ్యాప్తంగా పలుచోట్ల ఒకే కుటుంబానికి చెందిన వారు (అన్నదమ్ములు, భార్యాభర్తలు) టీడీపీ తరఫున ఎంపీటీసీ, జడ్పీటీసీలుగా గెలవడం గమనార్హం.