'మాతో ఉండండి లేదా మాకు వ్యతిరేకంగానైనా ఉండండి'.. ఇరాన్‌కు సాయం చేసినందుకు భారత దంపతులపై అమెరికా ఆంక్షలు

ఇరాన్‌పై విధించిన చమురు సంబంధిత ఆంక్షలను తప్పించుకోవడానికి సహకరిస్తున్నాయన్న ఆరోపణలపై అమెరికా కఠిన చర్యలు చేపట్టింది. భారత్, తుర్కియేకి చెందిన పలు కంపెనీలు, వ్యక్తులపై కొత్త ఆంక్షలను విధించింది. అమెరికాలో జరిగిన మధ్యంతర ఎన్నికల్లో ఇరాన్‌తో యుద్ధం, ద్రవ్యోల్బణం వంటి అంశాల ప్రభావంతో అధికార పార్టీకి ఎదురుదెబ్బ తగిలి, డెమొక్రాట్లు కాంగ్రెస్‌లో పట్టు సాధించిన మరుసటి రోజే ట్రంప్ ప్రభుత్వం ఈ నిర్ణయం తీసుకోవడం ప్రాధాన్యం సంతరించుకుంది.

భారతీయులపై ఆంక్షలు ఎందుకు?
చండీగఢ్‌కు చెందిన సునీల్ కుమార్ శర్మ, ఆయన భార్య జస్‌ప్రీత్ ప్రీతి షాహిద్‌తో పాటు మరికొందరు భారతీయులు, వారికి సంబంధించిన తొమ్మిది కంపెనీలపై ఆంక్షలు విధించినట్లు అమెరికా ట్రెజరీ విభాగం వెల్లడించింది. వీరంతా సముద్ర వాణిజ్యంలో మోసాలకు పాల్పడుతూ, ఇరాన్ 'షాడో ఫ్లీట్'కు సహకరించారని ఆరోపించింది. గయానా, ఈశ్వతిని, లావోస్ వంటి దేశాల పేర్లతో నకిలీ వెబ్‌సైట్లు సృష్టించి, తప్పుడు ఫ్లాగ్‌లు, నకిలీ ధ్రువపత్రాలు జారీ చేశారని పేర్కొంది. 

ఈ పత్రాల ద్వారా ఆంక్షలు ఎదుర్కొంటున్న ఇరాన్ సైన్యం, దాని అనుబంధ సంస్థలకు చెందిన నౌకలు అంతర్జాతీయ నిబంధనలను తప్పించుకుని పెట్రోలియం రవాణా చేసేందుకు వీరు సహకరించారని ట్రెజరీ శాఖ తన ప్రకటనలో వివరించింది. ఇలాంటి నకిలీ పత్రాలతో నడిచే నౌకలకు బీమా ఉండదని, అవి పర్యావరణ, భద్రతా నిబంధనలను ఉల్లంఘిస్తాయని తెలిపింది.

అదేవిధంగా ఆంక్షల జాబితాలో ఉన్న ఇరాన్ ఎయిర్‌లైన్స్‌కు తుర్కియేలో గ్రౌండ్ హ్యాండ్లింగ్ సేవలు అందిస్తున్నందుకు 'ఫ్యూగో గ్రౌండ్ సర్వీసెస్ ఇంక్' అనే సంస్థపైనా చర్యలు తీసుకుంది.

తీవ్రంగా హెచ్చరించిన అమెరికా
'ఆపరేషన్ ఎకనామిక్ అవుట్‌కాస్ట్'లో భాగంగా ఈ చర్యలు తీసుకున్నట్లు ట్రెజరీ సెక్రటరీ స్కాట్ బెస్సెంట్ తెలిపారు. "మీరు మాతోనైనా ఉండాలి లేదా మాకు వ్యతిరేకంగానైనా ఉండాలి. ఇరాన్ ప్రభుత్వానికి మద్దతిచ్చే వారు ఎక్కడున్నా వదిలిపెట్టం. భూమి, సముద్రం, గగన మార్గాల్లో ఇరాన్‌కు సహకరించేవారిపై ఆంక్షలు కొనసాగిస్తాం" అని ఆయన తీవ్రంగా హెచ్చరించారు.

'రాయిటర్స్' వార్తా సంస్థ కథనం ప్రకారం.. మధ్యంతర ఎన్నికల్లో ఓటమి పాలైనప్పటికీ, ట్రంప్ ప్రభుత్వం ఇరాన్‌పై ఆర్థిక యుద్ధాన్ని మరింత తీవ్రతరం చేస్తోందని నిపుణులు విశ్లేషిస్తున్నారు. వాషింగ్టన్ ఏమాత్రం వెనక్కి తగ్గే సూచనలు కనిపించడం లేదని అబ్సిడియన్ రిస్క్ అడ్వైజర్స్ మేనేజింగ్ ప్రిన్సిపాల్ బ్రెట్ ఎరిక్సన్ పేర్కొన్నారు. 

ఈ ఆంక్షల కారణంగా ఇరాన్ ఆర్థిక వ్యవస్థ కుదేలవుతోందని, ద్రవ్యోల్బణం 90 శాతానికి చేరిందని ట్రెజరీ విభాగం గతంలో తెలిపింది. ఈ నేపథ్యంలో నకిలీ ఫ్లాగ్‌లతో నడిచే నౌకలతో వ్యవహరించడంలో ఉన్న ప్రమాదాలపై అమెరికా విదేశీ ఆస్తుల నియంత్రణ కార్యాలయం (ఓఎఫ్ఏసీ) మారిటైమ్ రంగానికి కొత్త హెచ్చరిక జారీ చేసింది.