ఎంపీటీసీ, జడ్పీటీసీ ఎన్నికల్లో క్లీన్ స్వీప్ చేయాలి: కూటమి పార్టీల నేతలకు చంద్రబాబు పిలుపు

రేపు జరగనున్న ఎంపీటీసీ, జడ్పీటీసీ ఎన్నికల్లో కూటమి పూర్తిస్థాయిలో విజయం సాధించాలని, అన్ని స్థానాలనూ కైవసం చేసుకోవాలని ముఖ్యమంత్రి చంద్రబాబు పార్టీ శ్రేణులకు పిలుపునిచ్చారు. మున్సిపల్ ఎన్నికల్లో కూటమి సాధించిన ఘన విజయం స్ఫూర్తితో ముందుకు సాగాలని సూచించారు. అమరావతి నుంచి టీడీపీ, జనసేన, బీజేపీ నేతలు, కార్యకర్తలతో నిర్వహించిన టెలికాన్ఫరెన్స్‌లో ఆయన మాట్లాడుతూ ఆయన ఈ వ్యాఖ్యలు చేశారు.

మున్సిపల్ ఎన్నికల్లో కూటమి 94 శాతం స్ట్రైక్ రేట్‌తో విజయం సాధించడంపై నేతలను, కార్యకర్తలను చంద్రబాబు అభినందించారు. ఈ గెలుపు కూటమి ప్రభుత్వ బాధ్యతను మరింత పెంచిందని అన్నారు. "ప్రజలకు మనం అండగా నిలిస్తే, వారు మనతోనే ఉంటారని ఈ ఫలితాలు నిరూపించాయి. కూటమి ప్రభుత్వం పడుతున్న కష్టాన్ని ప్రజలు గుర్తించారు. సంక్షేమం, అభివృద్ధి, సుపరిపాలనకు వారు పట్టం కట్టారు" అని చంద్రబాబు పేర్కొన్నారు. ఈ ఎన్నికల్లో కొన్నిచోట్ల ఓటమి పాలైనా, అక్కడ కూడా కూటమి రెబెల్ అభ్యర్థులే గెలిచారని, స్థానిక సమన్వయ లోపాల వల్లే కొన్ని స్థానాలు కోల్పోయామని విశ్లేషించారు.

ఈ సందర్భంగా కూటమి ఐక్యతపై చంద్రబాబు కీలక వ్యాఖ్యలు చేశారు. మిత్రపక్షాలను గౌరవించుకోవాలని, కూటమిలోని ఏ పార్టీ అభ్యర్థి అయినా మన అభ్యర్థిగానే భావించి పనిచేయాలని హితవు పలికారు. "కుటుంబంలో, పార్టీలో అభిప్రాయ భేదాలు సహజం. కానీ ఒక నిర్ణయం తీసుకున్న తర్వాత అందరూ కట్టుబడి ఉండాలి. కూటమి ఐక్యతకు భంగం కలగకూడదు. పొత్తు ధర్మాన్ని పాటించని వారిని వదులుకోవడానికి కూడా సిద్ధం" అని గట్టిగా హెచ్చరించారు. స్థానిక ఎన్నికల్లో సీట్లు దక్కని వారికి నామినేటెడ్ పదవుల ద్వారా న్యాయం చేస్తామని హామీ ఇచ్చారు.

రాష్ట్ర ఆర్థిక వ్యవస్థ దివాలా తీసినా సంక్షేమాన్ని కొనసాగిస్తూనే, డీఎస్సీ, జాబ్ క్యాలెండర్ ద్వారా ఉద్యోగ నియామకాలు చేపడుతున్నామని తెలిపారు. గొడ్డలి పార్టీ హింసను ప్రేరేపిస్తోందని, ఓటమి భయంతో ప్రభుత్వంపై బురదజల్లుతోందని విమర్శించారు. వారి ఉచ్చులో పడకుండా సంయమనం పాటించాలని శ్రేణులకు సూచించారు.

ఈ టెలికాన్ఫరెన్స్‌లో జనసేన తరఫున మంత్రి నాదెండ్ల మనోహర్, ఏపీ టీడీపీ అధ్యక్షుడు పల్లా శ్రీనివాస్, ఏపీ బీజేపీ అధ్యక్షుడు పీవీఎన్ మాధవ్‌తో పాటు పలువురు కూటమి ముఖ్య నేతలు పాల్గొన్నారు.