పురపోరులో జనసేన ప్రభంజనం.. మరోసారి 100% స్ట్రైక్‌రేట్‌!

ఏపీ రాజకీయాల్లో జనసేన పార్టీ తన విజయ పరంపరను కొనసాగిస్తోంది. సార్వత్రిక ఎన్నికల్లో అద్భుతమైన ప్రదర్శన కనబరిచిన జనసేన, తాజాగా జరిగిన కార్పొరేషన్లు, మున్సిపాలిటీలు, నగర పంచాయతీ ఎన్నికల్లోనూ అదే జోరును ప్రదర్శించింది. ఏకంగా 100 శాతం స్ట్రైక్ రేట్‌తో అద్భుత విజయాన్ని నమోదు చేసింది. టీడీపీ-జనసేన-బీజేపీ కూటమి పొత్తులో భాగంగా జనసేనకు కేటాయించిన అన్ని స్థానాల్లోనూ జయకేతనం ఎగురవేసింది.

కూటమి ఒప్పందం ప్రకారం.. జనసేన పార్టీకి మొత్తం 4 మున్సిపల్ కార్పొరేషన్లు (మేయర్ స్థానాలు), 21 మున్సిపాలిటీలు/నగర పంచాయతీలు (ఛైర్‌పర్సన్ స్థానాలు) దక్కాయి. వీటిలో తాజాగా 2 కార్పొరేషన్లు (విజయవాడ, ఏలూరు), 15 మున్సిపాలిటీలు, 3 నగర పంచాయతీలకు ఎన్నికలు జరిగాయి. 

ఈ 20 స్థానాల్లోనూ జనసేన అభ్యర్థులే గెలుపొందడం విశేషం. ప్రతిష్ఠాత్మకమైన విజయవాడ మేయర్ అభ్యర్థిగా బరిలోకి దిగిన వంగవీటి రాధాకృష్ణ, ఏలూరు మేయర్ అభ్యర్థిగా పోటీ చేసిన రెడ్డి అప్పలనాయుడు ఘన విజయం సాధించి పార్టీకి కీలక విజయాలను అందించారు.

డిప్యూటీ సీఎం, జనసేన అధినేత పవన్ కల్యాణ్ ప్రాతినిధ్యం వహిస్తున్న పిఠాపురం నియోజకవర్గంలోని రెండు మున్సిపాలిటీలను జనసేన కైవసం చేసుకుంది. పిఠాపురం మున్సిపల్ ఛైర్‌పర్సన్‌గా జనసేన అభ్యర్థి దానం లాజర్‌బాబు వైసీపీ అభ్యర్థిపై 9,235 ఓట్ల భారీ మెజారిటీతో గెలుపొందారు. ఇక్కడి 36 వార్డుల్లో 3 జనసేనకు ఏకగ్రీవం కాగా, మిగిలిన వాటిలో జనసేన 16, టీడీపీ 5, బీజేపీ 1, వైసీపీ 1 గెలుచుకున్నాయి. 10 మంది స్వతంత్రులు గెలవగా, వారిలో 8 మంది కూటమి రెబల్స్ కావడం గమనార్హం.

రాష్ట్రవ్యాప్తంగా గెలిచిన ఛైర్‌పర్సన్‌లు వీరే:
రాష్ట్రవ్యాప్తంగా వివిధ మున్సిపాలిటీలు, నగర పంచాయతీల్లో ఛైర్‌పర్సన్‌లుగా గెలుపొందిన జనసేన అభ్యర్థుల వివరాలు ఈ విధంగా ఉన్నాయి.

• అమలాపురం: నల్లా శ్రీధర్
• పిఠాపురం: దానం లాజర్ బాబు
• తుని: శరగణం శ్రీలత
• ముమ్మిడివరం: గుబ్బల గంగా రత్నభవాని
• గొల్లప్రోలు: కడారి తమ్మయ్య నాయుడు
• సామర్లకోట: పిట్టా జానకి రామారావు
• నరసాపురం: కొత్తపల్లి శైలజ
• నిడదవోలు: మురాల జ్యోతి
• పెడన: నాగలింగ జ్యోత్స్న రాణి
• తెనాలి: తోటకూర వెంకట రమణారావు
• చిలకలూరిపేట: తోట రాజరాజేశ్వరి
• తిరువూరు: పి. మాధవి
• పుట్టపర్తి: ఎం. ఈశ్వర్
• మడకశిర: గుండుమల శారద
• దర్శి: దారం సుబ్బారావు
• పుత్తూరు: డి. ఏలుమలై
• సాలూరు: గొర్లె విజయకుమారి
• పొలకొండ: చల్లా విజయ నిర్మల

మొత్తం మీద సార్వత్రిక ఎన్నికల ఫలితాలను పునరావృతం చేస్తూ స్థానిక సమరంలోనూ జనసేన తన సత్తా చాటింది. ఈ విజయం పార్టీ శ్రేణుల్లో కొత్త ఉత్సాహాన్ని నింపింది. జనసేనకు కేటాయించిన మిగిలిన 2 కార్పొరేషన్లు, 3 మున్సిపాలిటీలకు కూడా త్వరలో ఎన్నికలు జరగనున్నాయి.