చౌటుప్పల్‌లో జోగిని దారుణ హత్య.. 130 తులాల బంగారం, 2.5 కిలోల వెండి అపహరణ

యాదాద్రి భువనగిరి జిల్లా చౌటుప్పల్‌లో సంచలనం సృష్టించిన జోగిని హత్య కేసును పోలీసులు గంటల వ్యవధిలోనే ఛేదించారు. జోగిని రాళ్లబండ సుధాకర్‌ను హత్య చేసి, భారీగా నగదు, బంగారం దోచుకెళ్లిన ఇద్దరు శిష్యులను అదుపులోకి తీసుకున్నారు. మృతుడి కారులో పారిపోతున్న నిందితులను జీపీఎస్ సిగ్నల్స్ ఆధారంగా పట్టుకోవడం గమనార్హం.

సంస్థాన్‌నారాయణపురం మండలం పుట్టపాకకు చెందిన రాళ్లబండ సుధాకర్ (50) కొంతకాలంగా చౌటుప్పల్‌లో నివసిస్తూ జోగినిగా, పండుగల పూజారిగా పేరుగాంచారు. ఈ క్రమంలో ఆయన ఆర్థికంగా బాగా స్థిరపడ్డారు. ఏటా అస్సాంలోని కామాఖ్య ఆలయానికి వెళ్లే సుధాకర్‌కు అక్కడే పవన్, హర్ష అనే ఇద్దరు యువకులతో పరిచయం ఏర్పడింది. మూడు రోజుల క్రితమే వారు ఆయన వద్ద శిష్యులుగా చేరి ఇంట్లోనే ఉంటున్నారు.

శనివారం అర్ధరాత్రి సుధాకర్‌పై దాడి చేసిన నిందితులు.. కాళ్లు, చేతులు కట్టేసి, కళ్లలో పెప్పర్ స్ప్రే చల్లి, గొంతు నులిమి కిరాతకంగా హత్య చేశారు. అనంతరం ఇంట్లోని బీరువాలో ఉన్న సుమారు 130 తులాల బంగారం, 2.5 కిలోల వెండి, రూ. 10 లక్షల నగదును దోచుకున్నారు. వీటి మొత్తం విలువ రూ.3 కోట్ల వరకు ఉంటుందని అంచనా. సాక్ష్యాలు దొరక్కుండా సీసీటీవీ హార్డ్ డిస్క్‌ను కూడా తమ వెంట తీసుకెళ్లారు.

పక్క ఇంట్లో ఉండే సుధాకర్ దత్తపుత్రుడు సురేష్, ఘటనను గుర్తించి పోలీసులకు సమాచారం ఇచ్చారు. రంగంలోకి దిగిన చౌటుప్పల్ సీఐ సతీశ్‌రెడ్డి బృందం, నిందితుల సెల్‌ఫోన్ సిగ్నల్స్, కారు జీపీఎస్ ఆధారంగా దర్యాప్తు ముమ్మరం చేసింది. నిందితులు పెద్ద అంబర్‌పేట్ ఓఆర్‌ఆర్ టోల్‌గేట్ దాటినట్లు గుర్తించి, జీపీఎస్ సాయంతో వారి కారును సిద్దిపేట సమీపంలో అడ్డగించి అదుపులోకి తీసుకున్నట్లు సమాచారం. జిల్లా ఎస్పీ అక్షంశ్ యాదవ్ ఘటనాస్థలిని పరిశీలించి, విచారణను పర్యవేక్షించారు.

నమ్మిన శిష్యులే ఈ ఘాతుకానికి పాల్పడ్డారని కుటుంబ సభ్యులు ఆరోపిస్తున్నారు. ప్రస్తుతం నిందితులను విచారిస్తున్న పోలీసులు.. దోపిడీ కోసమే హత్య జరిగిందా? లేక ఇతర కారణాలు ఏమైనా ఉన్నాయా? అనే కోణంలో దర్యాప్తు చేస్తున్నారు. నిందితుల నుంచి చోరీ సొత్తును స్వాధీనం చేసుకోవాల్సి ఉంది.