రెండేళ్లలో మార్కెట్‌లోకి 2000 కొత్త కంపెనీలు.. సెబీ ఛైర్మన్ కీలక వ్యాఖ్యలు

భారత క్యాపిటల్ మార్కెట్లలోకి రాబోయే రెండేళ్లలో సుమారు 2000 కొత్త కంపెనీలు ప్రవేశించే అవకాశం ఉందని సెక్యూరిటీస్ అండ్ ఎక్స్ఛేంజ్ బోర్డ్ ఆఫ్ ఇండియా (సెబీ) ఛైర్మన్ తుహిన్ కాంత పాండే అంచనా వేశారు. భారత్ ఛాంబర్ ఆఫ్ కామర్స్ ఆధ్వర్యంలో జరిగిన ఒక కార్యక్రమంలో ఆయన ఈ కీలక వ్యాఖ్యలు చేశారు. ప్రస్తుతం మార్కెట్‌లో నెలకొన్న సానుకూల ధోరణి ఈ అంచనాలకు బలం చేకూరుస్తోందని ఆయన అభిప్రాయపడ్డారు.

ఈ ఆర్థిక సంవత్సరం (2026-27) ఏప్రిల్ నుంచి సెప్టెంబర్ మధ్య కాలంలో 189 కంపెనీలు స్టాక్ మార్కెట్‌లో లిస్ట్ అయి, రూ. 98,038 కోట్లు సమీకరించాయి. గత ఏడాది ఇదే కాలంలో 186 కంపెనీలు కేవలం రూ. 71,085 కోట్లు మాత్రమే సేకరించాయి. ఇటీవలి జియో ప్లాట్‌ఫామ్స్ ఐపీఓ ద్వారా రూ. 30,213 కోట్లు సమీకరించడం మార్కెట్ ఉత్సాహాన్ని ప్రతిబింబిస్తోంది. ప్రిఫరెన్షియల్ ఇష్యూలు, క్యూఐపీలతో కలిపి ఈ ఆర్థిక సంవత్సరంలో ఇప్పటివరకు 914 కంపెనీలు మొత్తం రూ. 3.15 లక్షల కోట్ల నిధులను సమీకరించాయి.

దేశంలోని అనేక మధ్య శ్రేణి కంపెనీలకు ఈక్విటీ మార్కెట్ల ద్వారా నిధులు పొందే సామర్థ్యం ఉందని, అయితే లిస్టింగ్‌కు ముందు ఆర్థిక నివేదికల నాణ్యత, కార్పొరేట్ పాలన వంటి అంశాలను మెరుగుపరచుకోవాలని పాండే సూచించారు. ఈ దిశగా అర్హత ఉన్న కంపెనీలకు అవసరమైన తోడ్పాటును అందించాలని సీఐఐ, ఫిక్కీ వంటి పారిశ్రామిక సంస్థలను సెబీ కోరినట్లు ఆయన తెలిపారు.

ఇండిపెండెంట్ డైరెక్టర్ల పాత్రపై కూడా సెబీ ప్రత్యేక దృష్టి సారించింది. కేవలం నిబంధనల పాటింపునకే పరిమితం కాకుండా, మైనారిటీ ఇన్వెస్టర్లతో సహా వాటాదారులందరి ప్రయోజనాలను కాపాడటంలో వారు క్రియాశీలక పాత్ర పోషించాలని పాండే స్పష్టం చేశారు. సైబర్‌ సెక్యూరిటీ, ఆర్టిఫిషియల్ ఇంటెలిజెన్స్, సుస్థిరత వంటి ఆధునిక అంశాలపై కూడా వారు అవగాహన పెంచుకోవాలని సూచించారు. ప్రస్తుతం బీఎస్ఈలో సుమారు 5,300 కంపెనీలు నమోదై ఉన్నాయి.