పార్టీలు కాదు.. పనిచేసే నాయకులకే పట్టం కట్టాలి: బాలకృష్ణ

హిందూపురం ఎమ్మెల్యే, ప్రముఖ సినీ నటుడు నందమూరి బాలకృష్ణ ప్రజలకు కీలక పిలుపునిచ్చారు. అభివృద్ధి చేసే నాయకులకే ఓటు వేసి పట్టం కట్టాలని, పనిచేయని వారికి ఓటుతోనే బుద్ధి చెప్పాలని స్పష్టం చేశారు. శ్రీ సత్యసాయి జిల్లా హిందూపురంలోని చౌడేశ్వరి కాలనీ మూడో వార్డులోని పోలింగ్ బూత్‌లో బాలకృష్ణ తన భార్యతో కలిసి ఓటు హక్కును వినియోగించుకున్నారు.

ఈ సందర్భంగా ఆయన మీడియాతో మాట్లాడుతూ.. ఓటు వేయడం ప్రతి పౌరుడి ప్రాథమిక బాధ్యత అని గుర్తుచేశారు. "ప్రజాస్వామ్యంలో ఓటు ఎంతో విలువైంది. ప్రతి ఒక్కరూ ఆలోచించి ఓటు వేయాలి. ఎందుకంటే మీ భవిష్యత్తును నిర్ణయించేది ఓటే" అని ఆయన ప్రజలకు సూచించారు. పార్టీలను కాకుండా, అభివృద్ధిని చూసి ఓటు వేయాలని కోరారు.

ఓటు వేయడానికి వచ్చిన బాలకృష్ణ, పోలింగ్ కేంద్రం వద్ద సామాన్యులతో పాటు క్యూ లైన్‌లో నిలబడటం విశేషం. ప్రజాస్వామ్యంలో ఎమ్మెల్యే అయినా, సామాన్యుడైనా ఓటు విలువ ఒక్కటేనని ఆయన వ్యాఖ్యానించారు. సామాన్య ఓటరులా క్యూ లైన్‌లో నిల్చొని తన వంతు వచ్చాక ఓటు వేసి, ప్రజాస్వామ్య స్ఫూర్తిని చాటారు.