కురుపాం టీడీపీ ఎమ్మెల్యే జగదీశ్వరి ప్రచారంలో ఉద్రిక్తత

విజయనగరం జిల్లా కురుపాం మండలం ఆర్నాడ పంచాయతీలో శనివారం ఉద్రిక్తత నెలకొంది. ఎన్నికల ప్రచారంలో ఉన్న కురుపాం టీడీపీ ఎమ్మెల్యే, ప్రభుత్వ విప్ తోయక జగదీశ్వరిపై జనసేన కార్యకర్తలు దాడికి ప్రయత్నించడంతో ఇరువర్గాల మధ్య ఘర్షణ చోటుచేసుకుంది.

స్థానిక సంస్థల ఎన్నికల ప్రచార నిమిత్తం ఎమ్మెల్యే జగదీశ్వరి తన పార్టీ ఎంపీటీసీ, జెడ్పీటీసీ అభ్యర్థులతో కలిసి ఆర్నాడ పంచాయతీ కేంద్రానికి వెళ్లారు. ఈ విషయం తెలుసుకున్న కురుపాం జనసేన నియోజకవర్గ సమన్వయకర్త, మాజీ ఎమ్మెల్యే నిమ్మక జయరాజు తన అనుచరులతో అక్కడికి చేరుకున్నారు.

ఈ క్రమంలో జనసేన ఎంపీటీసీ అభ్యర్థి జోగి ప్రసాదమ్మ మద్దతుదారులు ‘ఎమ్మెల్యే డౌన్ డౌన్’ అంటూ నినాదాలు చేశారు. దీనికి ప్రతిగా టీడీపీ శ్రేణులు కూడా ఎమ్మెల్యేకు అనుకూలంగా నినాదాలు చేయడంతో వాతావరణం ఉద్రిక్తంగా మారింది. ఇరువర్గాల మధ్య వాగ్వివాదం పెరిగి, అది కాస్తా తోపులాటకు దారితీసింది. జనసేన కార్యకర్తల ప్రవర్తనపై ఎమ్మెల్యే జగదీశ్వరి తీవ్ర ఆగ్రహం వ్యక్తం చేశారు.

సమాచారం అందిన వెంటనే చినమేరంగి సీఐ టి.వి. తిరుపతి రావు, జియ్యమ్మవలస ఎస్ఐ ఎన్. ప్రశాంత్ కుమార్ తమ సిబ్బందితో ఘటనా స్థలానికి చేరుకుని ఇరువర్గాలను చెదరగొట్టారు. పోలీసుల జోక్యంతో పరిస్థితి అదుపులోకి వచ్చింది. ఈ ప్రచార కార్యక్రమంలో గ్రంథాలయ సంస్థ ఛైర్మన్ దొంకడ రామకృష్ణ, టీడీపీ రాష్ట్ర కార్యదర్శి బి. సురేష్, అరకు పార్లమెంట్ నియోజకవర్గ ప్రధాన కార్యదర్శి దత్తి లక్ష్మణరావు తదితరులు పాల్గొన్నారు.