చిన్న బౌండరీల్లో చితకబాదిన న్యూజిలాండ్‌.. భారత్‌ ముందు భారీ టార్గెట్‌

భారత బౌలర్లను ఉతికారేస్తూ న్యూజిలాండ్‌ బ్యాటర్లు గ్లెన్‌ ఫిలిప్స్‌, మైకేల్‌ బ్రేస్‌వెల్‌ విధ్వంసం సృష్టించారు. వీరిద్దరి మెరుపు ఇన్నింగ్స్‌లతో నాలుగో టీ20లో కివీస్‌ నిర్ణీత 20 ఓవర్లలో 7 వికెట్లకు 259 పరుగుల భారీ స్కోరు సాధించింది. టీ20 అంతర్జాతీయ క్రికెట్‌లో న్యూజిలాండ్‌కు ఇదే అత్యధిక స్కోరు. భారత్‌పై ఏ జట్టుకైనా ఇదే అత్యధిక టీ20 స్కోరు కావడం గమనార్హం.

ఫిలిప్స్‌ కేవలం 49 బంతుల్లో 107 పరుగులు చేశాడు. ఇందులో 6 ఫోర్లు, 9 సిక్సర్లు ఉన్నాయి. ఈ సిరీస్‌లో ఇప్పటికే 82 నాటౌట్‌, 70 పరుగులతో రాణించిన అతడు.. నాలుగో మ్యాచ్‌లోనూ శతకంతో సత్తా చాటాడు. మరోవైపు బ్రేస్‌వెల్‌ 25 బంతుల్లోనే 65 పరుగులు బాదాడు. వీరిద్దరూ ఐదో వికెట్‌కు కేవలం 40 బంతుల్లోనే 115 పరుగులు జోడించి భారత బౌలర్లను ఒత్తిడిలోకి నెట్టారు. ఫిన్‌ అలెన్‌ 17 బంతుల్లో 31, డారిల్‌ మిచెల్‌ 9 బంతుల్లో 24 పరుగులు చేశారు.

టాస్‌ గెలిచిన భారత కెప్టెన్‌ శ్రేయస్‌ అయ్యర్‌ వరుసగా నాలుగోసారి బౌలింగ్‌ ఎంచుకున్నాడు. జట్టులో మయాంక్‌ యాదవ్‌, ఇషాన్‌ కిషన్‌ తిరిగి వచ్చారు. భువనేశ్వర్‌ కుమార్‌, వైభవ్‌ సూర్యవంశీ తుది జట్టులో చోటు కోల్పోయారు. ఆరంభంలో మయాంక్‌ తొలి ఓవర్‌లోనే టిమ్‌ సీఫెర్ట్‌ను ఔట్‌ చేసి భారత్‌కు శుభారంభం అందించాడు. డారిల్‌ మిచెల్‌ దూకుడుగా ఆడినా.. మయాంక్‌ అతడిని ఎల్బీడబ్ల్యూగా వెనక్కి పంపాడు. అనంతరం ఫిన్‌ అలెన్‌ కూడా భారీ షాట్లతో విరుచుకుపడ్డాడు. అతడిని అక్షర్‌ పటేల్‌ పెవిలియన్‌కు పంపడంతో భారత్‌ కాస్త ఊపిరి పీల్చుకుంది.

ఒక దశలో కివీస్‌ను కట్టడి చేసిన భారత బౌలర్లు.. ఫిలిప్స్‌, బ్రేస్‌వెల్‌ జోరును మాత్రం ఆపలేకపోయారు. నితీశ్‌ కుమార్‌ రెడ్డి వేసిన 16వ ఓవర్‌లో ఫిలిప్స్‌ వరుసగా నాలుగు సిక్సర్లు బాదాడు. ఆ ఓవర్‌లో ఏకంగా 32 పరుగులు వచ్చాయి. మయాంక్‌ యాదవ్‌ కూడా తన చివరి ఓవర్‌లో 20 పరుగులు సమర్పించుకున్నాడు. బ్రేస్‌వెల్‌ 19 బంతుల్లోనే అర్ధశతకం పూర్తి చేసుకున్నాడు. అతడిని ప్రిన్స్‌ యాదవ్‌ ఔట్‌ చేయగా, చివరి ఓవర్‌లో నితీశ్‌ బౌలింగ్‌లో ఫిలిప్స్‌ వెనుదిరిగాడు. భారత్‌ తరఫున మయాంక్‌ 3 వికెట్లు తీశాడు. అర్ష్‌దీప్‌ సింగ్‌, ప్రిన్స్‌ యాదవ్‌, నితీశ్‌ తలో వికెట్‌ పడగొట్టారు. ఈ మ్యాచ్‌లో అర్ష్‌దీప్‌ తన టీ20 అంతర్జాతీయ వికెట్ల సంఖ్యను 150కి చేర్చుకున్న తొలి భారత బౌలర్‌గా నిలిచాడు.