నా చెల్లి అపర్ణ సమర్థురాలు.. గెలిపించండి: నటుడు జగపతి బాబు

గుంటూరు నగర మేయర్ ఎన్నికల ప్రచారం ఊపందుకుంది. ఎన్డీఏ కూటమి (టీడీపీ-జనసేన-బీజేపీ) మేయర్ అభ్యర్థిగా పోటీ చేస్తున్న కోవెలమూడి లక్ష్మీ అపర్ణకు మద్దతుగా ప్రముఖ సినీ నటుడు జగపతి బాబు ప్రచార బరిలోకి దిగారు. ఓటర్లను అభ్యర్థిస్తూ ఆయన ఒక ప్రత్యేక వీడియో సందేశాన్ని విడుదల చేశారు.

ఈ సందేశంలో జగపతి బాబు మాట్లాడుతూ.. "ప్రజలు చాలా తెలివైనవారు. సాధారణ ఎన్నికల్లో కూటమి అభ్యర్థులను భారీ మెజారిటీతో గెలిపించినందుకు గుంటూరు ప్రజలకు ధన్యవాదాలు. ఇప్పుడు నవంబర్ 1న జరగనున్న మేయర్ ఎన్నికల్లోనూ, మా చెల్లి కోవెలమూడి లక్ష్మీ అపర్ణను అదే విధంగా ఆశీర్వదించాలని మనస్ఫూర్తిగా కోరుకుంటున్నాను" అని అన్నారు.

"నా చెల్లికి మంచి మనసు ఉంది, సమర్థురాలు. తప్పకుండా గుంటూరుకు మంచి చేస్తుంది. మీ అమూల్యమైన ఓటును సైకిల్ గుర్తుపై వేసి ఆమెను గెలిపించండి. ఆమెతో పాటు కూటమి కార్పొరేటర్ అభ్యర్థులందరినీ కూడా భారీ మెజారిటీతో గెలిపించండి" అని జగపతి బాబు విజ్ఞప్తి చేశారు. ప్రస్తుతం కూటమి మేయర్ అభ్యర్థిగా లక్ష్మీ అపర్ణ నగరంలోని పలు డివిజన్లలో విస్తృతంగా పర్యటిస్తూ స్థానిక సమస్యల పరిష్కారం, నగర అభివృద్ధే లక్ష్యంగా ప్రచారం నిర్వహిస్తున్నారు.