బీజేపీ మహా పాదయాత్ర ట్యాంక్‌బండ్‌పై కాదా? అమిత్‌ షా రాకతో మారుతున్న ప్లాన్‌!

హైదరాబాద్‌లో నవంబర్‌ 2న నిర్వహించనున్న బీజేపీ మహా పాదయాత్రకు సంబంధించి పార్టీ కీలక మార్పుల దిశగా ఆలోచిస్తోంది. తొలుత ట్యాంక్‌బండ్‌ నుంచి పాదయాత్ర చేపట్టాలని భావించినప్పటికీ, కేంద్ర హోంమంత్రి అమిత్‌ షా హాజరవుతుండటంతో రూట్‌ను మార్చే యోచనలో ఉన్నట్లు సమాచారం. భద్రతా ఏర్పాట్లు, పరిపాలనాపరమైన అంశాలతో పాటు భారీగా కార్యకర్తలు తరలివచ్చే అవకాశం ఉండటంతో ప్రత్యామ్నాయ ప్రాంతాలను పరిశీలిస్తున్నట్లు తెలుస్తోంది.

అమిత్‌ షా పాల్గొనే ఈ కార్యక్రమానికి భారీగా జనసమీకరణ చేయాలని బీజేపీ భావిస్తోంది. పాదయాత్రతో పాటు చివర్లో భారీ బహిరంగ సభ నిర్వహించే ఆలోచనలోనూ ఉంది. ఈ నేపథ్యంలో సభకు అనువైన ప్రాంతంగా నాంపల్లిలోని ఎగ్జిబిషన్‌ గ్రౌండ్‌ను పార్టీ ముఖ్య నేతలు పరిశీలించినట్లు సమాచారం.

ఓటర్ల జాబితాల ప్రత్యేక సమగ్ర సవరణ (సర్‌) ప్రక్రియపై కాంగ్రెస్‌, ఇండియా కూటమి చేస్తున్న విమర్శలను తిప్పికొట్టడమే లక్ష్యంగా బీజేపీ ఈ మహా పాదయాత్రను నిర్వహించనుంది. ఓటర్ల జాబితాల సవరణపై ప్రజల్లో అవగాహన కల్పించడంతో పాటు, విపక్షాల ఆరోపణలకు సమాధానం చెప్పాలని పార్టీ భావిస్తోంది.

నవంబర్‌ 2న జరగనున్న ఈ కార్యక్రమానికి తెలంగాణ బీజేపీ అధ్యక్షుడు ఎన్‌. రాంచందర్‌ రావు నేతృత్వం వహించనున్నారు. అమిత్‌ షా రాకతో కార్యక్రమాన్ని మరింత భారీ స్థాయిలో నిర్వహించేందుకు పార్టీ ఏర్పాట్లు చేస్తోంది. అయితే పాదయాత్ర ఎక్కడి నుంచి ప్రారంభమవుతుంది? ఏ మార్గంలో సాగుతుంది? బహిరంగ సభ ఎక్కడ జరుగుతుంది? అనే అంశాలపై అధికారిక ప్రకటన రావాల్సి ఉంది.