తుపాను బాధితులకు సంఘీభావం.. 'కల్ట్' ప్రీ-రిలీజ్ ఈవెంట్ రద్దు

టాలీవుడ్ యువ నటుడు విష్వక్ సేన్ తన రాబోయే చిత్రం 'కల్ట్' ప్రీ-రిలీజ్ ఈవెంట్‌ను రద్దు చేస్తున్నట్లు ప్రకటించారు. ఆంధ్రప్రదేశ్‌ను 'అర్నాబ్' తుపాను అతలాకుతలం చేస్తున్న నేపథ్యంలో, బాధితులకు సంఘీభావంగా ఈ నిర్ణయం తీసుకున్నట్లు తెలిపారు. ఈరోజు ఈ వేడుకను రద్దు చేస్తున్నట్లు ఆయన వెల్లడించారు.

ఈ మేరకు ఆయన ఒక వీడియో సందేశాన్ని విడుదల చేశారు. "ఆంధ్రప్రదేశ్‌లో అర్నాబ్ తుపాను ఎలాంటి విధ్వంసం సృష్టిస్తోందో అందరికీ తెలుసు. ఇలాంటి కష్టకాలంలో మనం బాధితులకు అండగా నిలవాలి. ఇప్పుడు వేడుకలు నిర్వహించడం సరికాదని భావించి ఈవెంట్‌ను రద్దు చేస్తున్నాం. మనమంతా ఏపీకి అండగా నిలవాలి" అని విష్వక్ సేన్ పేర్కొన్నారు.

అయితే, ప్రీ-రిలీజ్ ఈవెంట్ మాత్రమే రద్దు చేశామని, సినిమా ప్రచార కార్యక్రమాలు కొనసాగుతాయని ఆయన స్పష్టం చేశారు. ఈ రోజు ఒక ప్రెస్ మీట్ నిర్వహించి, 'కల్ట్' రిలీజ్ ట్రైలర్‌ను విడుదల చేయనున్నట్లు తెలిపారు. ఇక ఈ చిత్రం ముందుగా ప్రకటించినట్లుగానే అక్టోబర్ 30న థియేటర్లలో విడుదల కానుంది. ఈ విడుదల తేదీలో ఎలాంటి మార్పు లేదని చిత్రబృందం స్పష్టం చేసింది.