నా కుటుంబం పట్ల వివక్ష చూపారు.. విమానయాన సిబ్బంది ప్రవర్తన షాకింగ్‌గా అనిపించింది: సంగక్కర

శ్రీలంక క్రికెట్ దిగ్గజం, మాజీ కెప్టెన్ కుమార సంగక్కర సంచలన ఆరోపణలు చేశాడు. ఐర్లాండ్‌లోని డబ్లిన్ విమానాశ్రయంలో 'రయన్‌ఎయిర్' విమానయాన సంస్థ సిబ్బంది తన కుటుంబం పట్ల వివక్షపూరితంగా, బెదిరింపు ధోరణిలో ప్రవర్తించారని ఆరోపించాడు. ఈ షాకింగ్ అనుభవాన్ని సోషల్ మీడియా ప్లాట్‌ఫామ్ 'ఎక్స్‌' (ట్విట్టర్) వేదికగా సంగక్కర పంచుకున్నాడు.

"డబ్లిన్‌లోని రయన్‌ఎయిర్ గేట్ సిబ్బందితో ఎవరికైనా వివక్షపూరిత అనుభవాలు ఎదురయ్యాయా? నాకు, నా కుటుంబానికి ఇప్పుడే అలాంటి అనుభవం ఎదురైంది. ఇది చాలా షాకింగ్‌గా ఉంది. వాళ్లు మాట్లాడిన తీరు, ప్రొసీజర్‌ను తప్పుగా హ్యాండిల్ చేయడం, బెదిరింపు ధోరణి ఆమోదయోగ్యం కాదు. ఏ ప్రయాణికుడికీ ఇలా జరగకూడదు. డబ్లిన్‌లో నాకు ఎదురైన తొలి చేదు అనుభవం ఇదే" అని సంగక్కర తన పోస్ట్‌లో పేర్కొన్నాడు. అయితే, సిబ్బందితో వివాదానికి దారితీసిన కచ్చితమైన కారణాలను వెల్లడించలేదు.

సంగక్కర పోస్ట్‌పై సంజీవ వీరవారణ అనే మరో శ్రీలంక వ్యక్తి స్పందిస్తూ, తాను కూడా పశ్చిమ దేశాల్లో తరచూ వివక్షను ఎదుర్కొన్నానని తెలిపారు. దీనికి సంగక్కర బదులిస్తూ.. "ఇలాంటివి ఎదురైనప్పుడు చాలా కలత చెందుతాం" అని వ్యాఖ్యానించాడు. ఈ ఆరోపణలపై రయన్‌ఎయిర్ సంస్థ ఇంకా అధికారికంగా స్పందించలేదు.

కుమార సంగక్కర శ్రీలంక క్రికెట్ చరిత్రలో గొప్ప బ్యాటర్లలో ఒకడిగా ఖ్యాతిగాంచాడు. 2015లో అంతర్జాతీయ క్రికెట్‌కు వీడ్కోలు పలికిన అత‌డు, 134 టెస్టులు, 404 వన్డేలలో దేశానికి ప్రాతినిధ్యం వహించాడు. శ్రీలంక జట్టు 2007, 2011 ప్రపంచకప్ ఫైనల్స్‌కు చేరడంలో కీలక పాత్ర పోషించాడు. ప్రస్తుతం ఐపీఎల్ లో రాజస్థాన్ రాయల్స్ జట్టుకు హెడ్ కోచ్‌గా వ్యవహరిస్తున్నాడు. ఇంతటి పేరున్న క్రీడాకారుడు చేసిన ఆరోపణలతో ఈ విషయం ఇప్పుడు చర్చనీయాంశంగా మారింది.