మహారాష్ట్రలో బీజేపీకి షాక్‌.. సీఎం ఫడ్నవీస్‌ సొంత ప్రాంతంలో కాంగ్రెస్‌ విజయం!

మహారాష్ట్ర ఎమ్మెల్సీ ఎన్నికల్లో నాగ్‌పూర్‌ ఫలితం బీజేపీకి గట్టి ఎదురుదెబ్బగా మారింది. ముఖ్యమంత్రి దేవేంద్ర ఫడ్నవీస్‌ సొంత ప్రాంతంలోనే కాంగ్రెస్‌ అభ్యర్థి విజయం సాధించడంతో రాజకీయంగా చర్చ మొదలైంది. ఫలితాలు పూర్తిగా వెలువడకముందే కాంగ్రెస్‌పై విమర్శలు చేసిన బీజేపీ నేతలకు ఈ గెలుపు సమాధానంగా మారింది. ప్రధాని మోదీ పోస్టును ప్రస్తావిస్తూ కాంగ్రెస్‌ నేతలు ఎదురుదాడికి దిగారు. రాష్ట్రంలో ఐదు స్థానాలకు జరిగిన ఎన్నికల్లో ప్రతిపక్ష మహా వికాస్‌ అఘాడీ మూడు స్థానాలను గెలుచుకుంది. అధికార మహాయుతి కూటమి రెండు స్థానాలకే పరిమితమైంది. 

నాగ్‌పూర్‌ పట్టభద్రుల నియోజకవర్గంలో కాంగ్రెస్‌ అభ్యర్థి అభిజిత్‌ వంజారి విజయం సాధించారు. బీజేపీ అభ్యర్థి సుధాకర్‌ కోహ్లేను 3,271 ఓట్ల తేడాతో ఓడించారు. ఓట్ల లెక్కింపు 40 గంటలకు పైగా సాగిన తర్వాత గురువారం ఫలితం వెలువడింది. బీజేపీకి సంప్రదాయంగా బలమైన స్థానంగా ఉన్న నాగ్‌పూర్‌లో కాంగ్రెస్‌ గెలవడం ప్రాధాన్యం సంతరించుకుంది. ఫడ్నవీస్‌తో పాటు కేంద్ర మంత్రి నితిన్‌ గడ్కరీ ప్రచారం చేసినా బీజేపీకి ఓటమి తప్పలేదు. 

ఎమ్మెల్సీ ఎన్నికల్లో కాంగ్రెస్‌కు ఒక్క సీటు కూడా దక్కలేదంటూ ప్రధాని నరేంద్ర మోదీ బుధవారం సామాజిక మాధ్యమాల్లో వ్యంగ్యంగా స్పందించారు. నాలుగు రాష్ట్రాల్లో 28 స్థానాలకు జరిగిన ఎన్నికల్లో కాంగ్రెస్‌ ఎన్ని సీట్లు గెలిచిందో ఊహించాలంటూ ప్రశ్నించారు. అయితే నాగ్‌పూర్‌ ఫలితం కాంగ్రెస్‌కు ఊరటనిచ్చింది. మోదీ వ్యాఖ్యలను ప్రస్తావిస్తూ బీజేపీపై విమర్శలు గుప్పించేందుకు కాంగ్రెస్‌కు అవకాశం లభించింది. 

ఫలితాలు పూర్తిగా రాకముందే కాంగ్రెస్‌ సున్నా సీట్లకే పరిమితమైందంటూ ఫడ్నవీస్‌ చేసిన పోస్టును ఆయన తొలగించారని మహారాష్ట్ర కాంగ్రెస్‌ విమర్శించింది. ఆయన పోస్టు స్క్రీన్‌షాట్‌ను సామాజిక మాధ్యమాల్లో పంచుకుంది. తొందరపడి చేసిన వ్యాఖ్యలు చివరకు ఇబ్బందికరంగా మారాయని ఎద్దేవా చేసింది. 2029లో మహారాష్ట్ర ప్రజలు మరింత గట్టి రాజకీయ షాక్‌ ఇస్తారని హెచ్చరించింది. 

నాగ్‌పూర్‌లో ఫడ్నవీస్‌ స్వయంగా ప్రచారం చేసినా బీజేపీ ఓడిపోవడాన్ని ఎన్సీపీ (శరద్‌ పవార్‌ వర్గం) ఎమ్మెల్యే రోహిత్‌ పవార్‌ ప్రస్తావించారు. బ్యాలెట్‌ పేపర్లతో ఎన్నికలు నిర్వహించడం వల్లే ఈ ఫలితం వచ్చిందంటూ వ్యంగ్యంగా వ్యాఖ్యానించారు. అయితే ఈవీఎంలపై ప్రతిపక్షాలు గతంలో చేసిన ఆరోపణలను బీజేపీ, ఎన్నికల సంఘం ఖండించాయి. మరోవైపు, తన పార్టీ అభ్యర్థి ఓటమిపై ఎన్సీపీ నేత ప్రఫుల్‌ పటేల్‌ స్పందించారు. పార్టీ ప్రాధాన్యాలు, సంస్థాగత నిర్మాణాన్ని వెంటనే సమీక్షించుకోవాల్సిన అవసరం ఉందన్నారు.