స్పెయిన్‌లో ఘోర రైలు ప్రమాదం.. 68 మంది మృతి, రంగంలోకి భారత ఎంబసీ

స్పెయిన్‌లో బుధవారం ఘోర రైలు ప్రమాదం సంభవించింది. రెండు హైస్పీడ్ రైళ్లు ఒకదానికొకటి ఢీకొన్న ఘటనలో మృతుల సంఖ్య 68కి చేరింది. రాజధాని మాడ్రిడ్‌కు దక్షిణంగా 120 కిలోమీటర్ల దూరంలో ఉన్న టోలెడో ప్రావిన్స్‌లోని ఉర్దా స్టేషన్ సమీపంలో ఈ ప్రమాదం చోటుచేసుకుంది.

ఆగి ఉన్న 'ఇర్యో' రైలును వెనుక నుంచి వచ్చిన 'రెన్ఫే' అనే మరో హైస్పీడ్ రైలు వేగంగా వచ్చి ఢీకొట్టింది. ఈ ఘటన తీవ్రతకు పలు బోగీలు పట్టాలు తప్పి, సమీపంలోని లోయలో పడిపోయాయి. ఈ ప్రమాదంలో మరో 58 మంది ఆసుపత్రి పాలవ్వగా, వారిలో 15 మంది పరిస్థితి విషమంగా ఉందని అధికారులు తెలిపారు. సుమారు 50 మందికి స్వల్ప గాయాలయ్యాయి. ప్రస్తుతం సహాయక బృందాలు స్నిఫర్ డాగ్స్ సాయంతో గాలింపు చర్యలు కొనసాగిస్తున్నాయి. 

కంప్యూటర్ కమ్యూనికేషన్ వ్యవస్థలో తలెత్తిన సాంకేతిక లోపం కారణంగా సేఫ్టీ సిస్టమ్ పనిచేయలేదని ప్రాథమికంగా నిర్ధారించారు. అయితే, రెడ్ సిగ్నల్ ఉన్నప్పటికీ కంట్రోల్ సెంటర్ నుంచి రైలు ప్రయాణానికి అనుమతి లభించడం "వివరించలేని చర్య" అని స్పెయిన్ రవాణా శాఖ మంత్రి ఆస్కార్ పుయెంటె అభిప్రాయపడ్డారు. ప్రమాదానికి గల కచ్చితమైన కారణాలపై ప్రస్తుతం సమగ్ర దర్యాప్తు జరుగుతోందని ఆయన వెల్లడించారు.

ఈ ప్రమాదం నేపథ్యంలో మాడ్రిడ్‌లోని భారత రాయబార కార్యాలయం అప్రమత్తమైంది. బాధితుల కోసం ప్రత్యేకంగా ఒక ఎమర్జెన్సీ హెల్ప్‌లైన్‌ను ప్రారంభించింది. ప్రమాదానికి గురైన రైళ్లలో ప్రయాణిస్తున్న భారతీయులు లేదా వారి బంధువులు సహాయం కోసం ఎంబసీని సంప్రదించాలని సూచించింది. ఈ దుర్ఘటనపై స్పెయిన్ ప్రధాని పెడ్రో సాంచెజ్ తీవ్ర దిగ్భ్రాంతి వ్యక్తం చేశారు. దేశవ్యాప్తంగా మూడు రోజుల పాటు సంతాప దినాలు పాటిస్తున్నట్లు ప్రకటించారు.