ఉద్యోగి ఆత్మగౌరవమే ముఖ్యం.. వెయిటర్‌ను కొట్టిన గెస్ట్‌పై తాజ్ హోటల్ జీవితకాల నిషేధం

ఆగ్రాలోని ప్రఖ్యాత తాజ్ హోటల్‌లో ఓ వెయిటర్‌పై అతిథి చేయిచేసుకున్న ఘటన సంచలనం సృష్టిస్తోంది. ఈ అమానుష ఘటనపై హోటల్ యాజమాన్యం తీసుకున్న నిర్ణయం సర్వత్రా ప్రశంసలు అందుకుంటోంది. తమ సిబ్బంది ఆత్మగౌరవానికి భంగం కలిగించిన సదరు అతిథిని హోటల్‌లోకి రాకుండా జీవితకాలం నిషేధం (బ్లాక్‌లిస్ట్) విధించింది. ఈ విషయాన్ని హోటల్ ప్రాపర్టీని నిర్వహించే సిన్సియర్ డెవలపర్స్ జాయింట్ మేనేజింగ్ డైరెక్టర్ పరితోష్ లధానీ స్వయంగా ఓ లింక్డిన్ పోస్ట్ ద్వారా వెల్లడించారు.

అసలేం జరిగింది?
పరితోష్ లధానీ తన పోస్ట్‌లో వివరించిన ప్రకారం.. హోటల్‌లోని రెస్టారెంట్‌లో కాంతీ అనే వెయిటర్ ఒక అతిథికి సర్వీస్ అందిస్తున్నాడు. ఆ సమయంలో కమ్యూనికేషన్ గ్యాప్ కారణంగా ఇద్దరి మధ్య చిన్న అపార్థం చోటుచేసుకుంది. వెయిటర్‌కు ఇంగ్లీషులో పరిజ్ఞానం తక్కువగా ఉండటంతో పొరపాటు జరిగింది. దీంతో ఆగ్రహానికి గురైన ఆ అతిథి, అందరూ చూస్తుండగానే వెయిటర్ కాంతీ చెంపపై కొట్టాడు.

అయితే, తనను తీవ్రంగా కలచివేసిన విషయం మరొకటి ఉందని పరితోష్ పేర్కొన్నారు. ఈ ఘటన గురించి వెయిటర్ కాంతీ ఎవరికీ ఫిర్యాదు చేయలేదు. విషయం తెలుసుకున్న యాజమాన్యం, దీనిపై ఎందుకు మౌనంగా ఉన్నావని ప్రశ్నించగా, కాంతీ చెప్పిన సమాధానం వారిని కదిలించింది. 

తాను ఆగ్రా సమీపంలోని ఓ పేద రైతు కుటుంబం నుంచి వచ్చానని, తాజ్ హోటల్‌లో పనిచేయడం తన కల అని, దానిని రిస్క్‌లో పెట్టే ఏ పనీ చేయాలనుకోలేదని కాంతీ వివరించాడు. తన ఉద్యోగం పోతుందనే భయంతోనే అవమానాన్ని మౌనంగా భరించినట్లు తెలిపాడు.

యాజమాన్యం కఠిన నిర్ణయం
కాంతీ మాటలు విని తీవ్రంగా చలించిపోయిన పరితోష్, ఆ మరుసటి రోజే ఆ అతిథిని హోటల్ నుంచి జీవితకాలం నిషేధిస్తున్నట్లు ప్రకటించారు. తన లింక్డిన్ పోస్ట్‌లో ఆయన దీనిపై ఘాటుగా స్పందించారు. "మా తాజ్ ఆగ్రా ప్రాపర్టీ నుంచి ఒక అతిథిని జీవితకాలం బ్లాక్‌లిస్ట్ చేశాను. మా వెయిటర్‌తో వారు ప్రవర్తించిన తీరు భయంకరమైనది. నా బృందంలోని వారిని అగౌరవపరిచే హక్కు ఎవ్వరికీ లేదు. ఇక శారీరకంగా దాడి చేయడాన్ని అస్సలు సహించను" అని ఆయన స్పష్టం చేశారు.

కస్టమర్ ఎంత పెద్ద వ్యక్తి అయినా, ఎంత డబ్బు ఖర్చు చేసినా ఉద్యోగుల పట్ల అమర్యాదగా ప్రవర్తించే హక్కు వారికి లేదని ఆయన స్పష్టం చేశారు. "మన ఉద్యోగులు తమ ఆత్మగౌరవం కోసం నిలబడటానికి భయపడితే, వారి కోసం నిలబడాల్సిన బాధ్యత మనదే!" అని పరితోష్ పేర్కొన్నారు.

ఈ లింక్డిన్ పోస్ట్ వేలకొద్దీ రియాక్షన్లతో వైరల్‌గా మారింది. హోటల్ యాజమాన్యం తీసుకున్న నిర్ణయాన్ని నెటిజన్లు ప్రశంసలతో ముంచెత్తారు. కొందరు నిందితుడిపై అధికారికంగా పోలీసులకు ఫిర్యాదు చేయాలని సూచించగా, మరికొందరు అతని పేరును ఎందుకు బయటపెట్టలేదని ప్రశ్నించారు. 

మొత్తంమీద కస్టమర్ సంతృప్తి ఎంత ముఖ్యమో, ఉద్యోగుల ఆత్మగౌరవాన్ని కాపాడటం కూడా అంతే ముఖ్యమనే బలమైన సందేశాన్ని ఈ ఘటన ఇచ్చింది.