న్యూజిలాండ్ జట్టు కంటే మా వాళ్లే నయం: శామీ

న్యూజిలాండ్‌తో టీ20 సిరీస్‌లో టీమిండియా సృష్టిస్తున్న విధ్వంసంపై మాజీ కెప్టెన్, వెస్టిండీస్ హెడ్ కోచ్ డారెన్ శామీ ఆసక్తికర వ్యాఖ్యలు చేశాడు. ఇటీవల భారత్‌లో పర్యటించి 2-2తో సిరీస్‌ను సమం చేసిన తమ జట్టు సాధించిన విజయం ఎంత గొప్పదో ఇప్పుడు అందరికీ అర్థమవుతుందని అన్నాడు. కివీస్‌తో మూడో టీ20లో భారత బ్యాటర్ల ప్రదర్శన చూసి శామీ ఈ మేరకు స్పందించాడు. ప్రస్తుతం న్యూజిలాండ్ సిరీస్ లో టీమిండియా వరుసగా మూడు మ్యాచ్ ల్లో నెగ్గి 3-0తో సిరీస్ కైవసం చేసుకోవడం తెలిసిందే. మరో రెండు మ్యాచ్ లు మిగిలుండగానే, శ్రేయస్ అయ్యర్ సేన ఈ ఘనత సాధించింది. కివీస్ తన సొంతగడ్డపై ఆడుతున్నా ఈ సిరీస్ లో ఇప్పటిదాకా ఒక్క మ్యాచ్ కూడా గెలవలేకపోయింది. ఈ నేపథ్యంలో, డారెన్ శామీ చేసిన వ్యాఖ్యలు ప్రాధాన్యత సంతరించుకున్నాయి.

"వావ్... అందుకే నేను మా జట్టును ప్రశంసించాను. భారత్‌లో వారు సాధించింది గొప్ప విజయం. టీమిండియా చాలా ప్రమాదకరమైన జట్టు. చిన్న బౌండరీలు, బ్యాటింగ్‌కు స్వర్గధామంలాంటి పిచ్‌లు, బౌలర్లకు ఇబ్బంది కలిగించే తడి బంతి.. ఇలాంటి పరిస్థితుల్లో వారితో తలపడటం కష్టం" అని డారెన్ శామీ సోషల్ మీడియా ప్లాట్‌ఫామ్ 'ఎక్స్'లో పోస్ట్ చేశాడు.

వెల్లింగ్‌టన్‌లో న్యూజిలాండ్‌తో జరిగిన మూడో టీ20లో భారత్ అద్భుత ప్రదర్శన చేసింది. 199 పరుగుల భారీ లక్ష్యాన్ని కేవలం 13.2 ఓవర్లలోనే ఛేదించి 6 వికెట్ల తేడాతో ఘన విజయం సాధించింది. ముఖ్యంగా యువ బ్యాటర్ అభిషేక్ శర్మ ఆకాశమే హద్దుగా చెలరేగాడు. కేవలం 38 బంతుల్లోనే 113 పరుగులు చేసి కివీస్ బౌలింగ్‌ను చిన్నాభిన్నం చేశాడు. మరో ఓపెనర్ వైభవ్ సూర్యవంశీ (19 బంతుల్లో 45) అతనికి చక్కటి సహకారం అందించాడు. వీరిద్దరూ కలిసి కేవలం 7.1 ఓవర్లలో 133 పరుగుల భాగస్వామ్యం నెలకొల్పి మ్యాచ్‌ను ఏకపక్షం చేశారు.

ఈ విజయంతో ఐదు మ్యాచ్‌ల సిరీస్‌ను భారత్ 3-0తో కైవసం చేసుకుంది. ఈ మ్యాచ్‌లో టీమిండియా పలు రికార్డులను బద్దలు కొట్టింది. పవర్‌ప్లేలో వికెట్ నష్టపోకుండా 118 పరుగులు సాధించి, టీ20 చరిత్రలోనే అత్యధిక పవర్‌ప్లే స్కోరు నమోదు చేసిన జట్టుగా ప్రపంచ రికార్డు సృష్టించింది. కేవలం 5 ఓవర్లలోనే 100 పరుగుల మార్కును దాటి, ఈ ఘనత సాధించిన రెండో వేగవంతమైన జట్టుగా నిలిచింది.

ఇటీవల భారత పర్యటన ముగిసిన తర్వాత కూడా శామీ ఇదే తరహా వ్యాఖ్యలు చేశాడు. "సిరీస్ ప్రారంభానికి ముందు ఎవరూ మా గెలుపు అవకాశాల గురించి మాట్లాడలేదు. కానీ మేము డిఫెండింగ్ ఛాంపియన్‌కు దీటుగా ఆడాం. కొన్ని విభాగాల్లో వారిపై ఆధిపత్యం కూడా ప్రదర్శించాం. మా జట్టు ఎంతో పురోగతి సాధించింది" అని శామీ అప్పుడు పేర్కొన్నాడు. ఇప్పుడు న్యూజిలాండ్‌పై టీమిండియా ప్రదర్శన చూశాక, తన వ్యాఖ్యలకు బలం చేకూరిందని పరోక్షంగా తెలియజేశాడు. భారత్, కివీస్ జట్ల మధ్య నాలుగో టీ20 శుక్రవారం ఆక్లాండ్‌లో, చివరి మ్యాచ్ ఆదివారం హామిల్టన్‌లో జరగనున్నాయి.