15 ఏళ్లలో 38 మందిని చంపి తిన్న నరహంతకుడు.. ఉగాండాలో సీరియల్ కిల్లర్ అరెస్ట్!

ఉగాండా దేశాన్ని తీవ్ర భయాందోళనలకు గురిచేసిన ఓ నరమాంస భక్షకుడిని, సీరియల్ కిల్లర్‌ను భద్రతా దళాలు అరెస్ట్ చేశాయి. గత 15 ఏళ్లలో ఏకంగా 38 మందిని అత్యంత కిరాతకంగా చంపి, వారి మాంసాన్ని తిన్నాడనే భయంకరమైన ఆరోపణలు ఎదుర్కొంటున్న ఈ వ్యక్తిని ముజురిజి మోసెస్ అని గుర్తించారు. మసాకా, ఇబందా, కాజో జిల్లాల్లో 2010 నుంచి 2025 మధ్య కాలంలో ఈ ఘాతుకాలకు పాల్పడినట్లు అధికారులు తెలిపారు. ఈ అరెస్ట్‌ను ఉగాండా చీఫ్ ఆఫ్ డిఫెన్స్ ఫోర్సెస్, జనరల్ ముహూజి కైనెరుగబా సోమవారం సాయంత్రం 'ఎక్స్‌' సోషల్ మీడియా వేదికగా ప్రకటించారు.

"దుర్మార్గుడైన ముజురిజి మోసెస్‌ను మన భద్రతా దళాలు అరెస్ట్ చేశాయని పౌరులకు తెలియజేయడానికి సంతోషిస్తున్నాను. ఉగాండా చరిత్రలోనే అత్యంత కిరాతకమైన సీరియల్ కిల్లర్, నరమాంస భక్షకుడు ఇతను. 2010 నుంచి 2025 మధ్య 38 మందిని చంపి తిన్నాడు. ఇతడిని బహిరంగంగా విచారించి, కచ్చితంగా ఉరి తీస్తాం" అని జనరల్ కైనెరుగబా తన పోస్ట్‌లో పేర్కొన్నారు.

దర్యాప్తులో భయంకర నిజాలు.. 
స్థానిక అధికారుల ప్రకారం.. మోసెస్ అత్యంత క్రూరంగా నేరాలకు పాల్పడేవాడు. కుటుంబాలకు కుటుంబాలనే లక్ష్యంగా చేసుకుని, అర్ధరాత్రి ఇళ్లలోకి చొరబడి కత్తితో అందరినీ నరికి చంపేవాడని ఆరోపణలున్నాయి. మెట్రో నివేదిక ప్రకారం, పాస్టర్ స్టీవెన్ ముగాంబే ఇంట్లోకి తన అనుచరులతో కలిసి చొరబడిన మోసెస్, ఇంట్లో ఉన్న వారందరినీ కిరాతకంగా హతమార్చాడు. మరికొన్ని సందర్భాల్లో, ప్రేమ, సంబంధాల పేరుతో అమాయకులను ఆకర్షించి, వారిని చంపేవాడని దర్యాప్తులో తేలింది.

ఆశ్చర్యకరంగా మోసెస్‌ను గతంలో చాలాసార్లు పట్టుకున్నప్పటికీ, వివాదాస్పద పరిస్థితుల్లో అతను తప్పించుకోవడం లేదా విడుదల కావడం జరిగిందని తెలుస్తోంది. తాజాగా అరెస్ట్ చేసిన తర్వాత, నిందితుడి నివాసం నుంచి అధికారులు కీలక భౌతిక ఆధారాలను స్వాధీనం చేసుకున్నారు. ఆ ప్రాంతంలో నమోదైన పాత మిస్సింగ్ కేసులు, హత్య కేసులతో మోసెస్ నేరాలకు ఏమైనా సంబంధం ఉందా అనే కోణంలో దర్యాప్తు ముమ్మరం చేశారు. 

అయితే, మోసెస్‌పై ఉన్న ఆరోపణలు చట్టపరమైన విచారణలో నిరూపితం కావాల్సి ఉంది. ఈ అరెస్ట్‌తో దశాబ్దానికి పైగా కొనసాగుతున్న హత్యల వెనుక ఉన్న మిస్టరీ వీడుతుందని అధికారులు భావిస్తున్నారు. దర్యాప్తునకు సంబంధించిన మరిన్ని వివరాలు తెలియాల్సి ఉంది.