భోగాపురం నుంచి ఢిల్లీకి డైరెక్ట్ ఫ్లయిట్.. రేపటి నుంచే సేవలు

ఉత్తరాంధ్ర ప్రజల చిరకాల వాంఛ నెరవేరబోతోంది. భోగాపురం అల్లూరి సీతారామరాజు అంతర్జాతీయ విమానాశ్రయం నుంచి దేశ రాజధాని ఢిల్లీకి తొలిసారిగా నేరుగా విమాన సర్వీసులు ప్రారంభం కానున్నాయి. ప్రముఖ విమానయాన సంస్థ ఆకాశ ఎయిర్‌లైన్స్ ఈ సర్వీసులను ఆదివారం (అక్టోబర్ 25) నుంచి ప్రయాణికులకు అందుబాటులోకి తీసుకురానుంది. ఉత్తరాంధ్ర నుంచి ఢిల్లీకి ఇదే మొట్టమొదటి డైరెక్ట్ ఫ్లైట్ కావడం గమనార్హం.

ఈ కొత్త సర్వీసు షెడ్యూల్ ప్రకారం, ప్రతిరోజూ ఉదయం 6:00 గంటలకు ఢిల్లీలో బయలుదేరే విమానం, ఉదయం 8:00 గంటలకు భోగాపురం విమానాశ్రయానికి చేరుకుంటుంది. అనంతరం, ఇక్కడి నుంచి తొలి సర్వీసుగా ఉదయం 8:30 గంటలకు అదే విమానం ఢిల్లీకి తిరుగు ప్రయాణం అవుతుంది.

ఈ చారిత్రక సేవలను ప్రారంభించడం కోసం విమానాశ్రయంలో ప్రత్యేక కార్యక్రమం ఏర్పాటు చేశారు. జీఎంఆర్ సీఈవో/సీసీఏఓ కన్వర్ బీర్ సింగ్ కారా, ఆకాశ ఎయిర్‌లైన్స్ మేనేజర్ భూపతిరాజు అచ్యుత రామరాజు ఈ కార్యక్రమానికి హాజరై కేక్ కట్ చేసి, తొలి ప్రయాణికులకు టికెట్లను స్వయంగా అందజేయనున్నారు.

ఇప్పటివరకు ఉత్తరాంధ్ర ప్రాంత ప్రజలు ఢిల్లీ వెళ్లాలంటే కనెక్టింగ్ ఫ్లైట్లపై ఆధారపడాల్సి వచ్చేది. ఈ కొత్త డైరెక్ట్ సర్వీసుతో ప్రయాణ సమయం గణనీయంగా ఆదా కావడంతో పాటు ప్రయాణం మరింత సులభతరం, సౌకర్యవంతం కానుంది. ఈ పరిణామం పట్ల ఉత్తరాంధ్ర వాసులు హర్షం వ్యక్తం చేస్తున్నారు.