3000 పుస్తకాలు, 141 ఐక్యూ.. ఐదేళ్లకే 'మెన్సా'లో చోటు దక్కించుకున్న భారత సంతతి బాలుడు!

సాధారణంగా ఐదేళ్ల వయసులో పిల్లలు అక్షరాలు దిద్దుతూ, చిన్న చిన్న ఆటలు ఆడుకుంటూ ఉంటారు. కానీ, కెనడాలో నివసిస్తున్న భారత సంతతి బాలుడు అర్జున్ ప్రజాపతి మాత్రం ఈ వయసులోనే అసాధారణ ప్రతిభతో ప్రపంచాన్ని అబ్బురపరుస్తున్నాడు. కేవలం ఐదేళ్లకే మూడు వేలకు పైగా పుస్తకాలు చదివి, అత్యంత ప్రతిష్ఠాత్మకమైన హై-ఐక్యూ సొసైటీలు 'మెన్సా', 'ఇంటర్‌టెల్' లలో సభ్యత్వం సంపాదించి అరుదైన ఘనత సాధించాడు.

అర్జున్ తల్లిదండ్రులు గుజరాత్‌లోని వడోదరకు చెందినవారు. తండ్రి డాక్టర్ విశాల్ వి ప్రజాపతి వైద్యుడు, క్లినికల్ రీసెర్చర్ కాగా, తల్లి మహిత న్యాయవాది. కెనడాలో స్థిరపడిన ఈ దంపతులకు జన్మించిన అర్జున్, కేవలం 18 నెలల వయసు నుంచే పుస్తకాలు చదవడం ప్రారంభించాడు. ఇప్పటివరకు గణితం, ఖగోళశాస్త్రం, మానవ శరీరధర్మశాస్త్రం, జన్యుశాస్త్రం, మైక్రోబయాలజీ, చరిత్ర వంటి క్లిష్టమైన అంశాలకు సంబంధించిన 3,000కు పైగా పుస్తకాలను చదివేశాడు.

ఇటీవల నిర్వహించిన 'స్టాన్‌ఫర్డ్-బినెట్ ఇంటెలిజెన్స్ స్కేల్స్' పరీక్షలో అర్జున్ 141 ఫుల్ స్కేల్ ఐక్యూ (IQ) స్కోర్‌ సాధించాడు. ఈ స్కోర్ అతడిని ప్రపంచ జనాభాలో 99.7వ పర్సంటైల్‌లో నిలబెట్టింది. అంటే.. ప్రపంచంలోని 99.7 శాతం మంది కంటే అర్జున్ తెలివైనవాడని అర్థం. ఈ పరీక్షలో అతడి నాన్‌వెర్బల్ ఐక్యూ 149, ఫ్లూయిడ్ రీజనింగ్ 144, వర్కింగ్ మెమరీ 146గా నమోదైంది. 

ఈ అసాధారణ ప్రతిభ ఆధారంగా, నాలుగేళ్ల వయసులోనే అతను ఈ రెండు సొసైటీలకు అర్హత సాధించాడు. ప్రపంచ జనాభాలో అత్యంత ప్రతిభావంతులైన మొదటి 2 శాతం మందికి 'మెన్సా' సభ్యత్వం ఇస్తుంది. ఇక 'ఇంటర్‌టెల్' అయితే కేవలం మొదటి 1 శాతం మందిని మాత్రమే చేర్చుకుంటుంది. ఈ రెండు సంస్థల్లోనూ చోటు దక్కించుకోవడం అర్జున్ ప్రతిభకు నిదర్శనం.

అర్జున్ సాధించిన ఈ ఘనతకు కెనడా ప్రధాని మార్క్ కార్నీ, ఒంటారియో ప్రీమియర్ డౌగ్ ఫోర్డ్ నుంచి ప్రశంసాపత్రాలు అందాయి. అంతేకాకుండా అక్టోబర్ 29న ఒంటారియో లెజిస్లేటివ్ అసెంబ్లీలో అర్జున్‌ను ప్రత్యేకంగా సత్కరించనున్నారు.

తమ కుమారుడి ప్రతిభ గురించి తల్లిదండ్రులు మాట్లాడుతూ.. తాము 'ఒత్తిడి చేయకుండా ప్రోత్సహించడం' అనే విధానాన్ని అనుసరిస్తామని తెలిపారు. చదువుపై అర్జున్ చూపే ఆసక్తికి తాము అడ్డుచెప్పమని, అదే సమయంలో ఆటలు, సంగీతం, పెయింటింగ్ వంటి వాటిలోనూ పాల్గొనేలా చూస్తామని, తన చెల్లితో కలిసి ఆడుకునేందుకు కూడా సమయం కేటాయిస్తామని వివరించారు.

కృష్ణబిలాలు (black holes), అనంతం (infinity), మానవ రోగనిరోధక వ్యవస్థ, జన్యువుల గురించి అర్జున్ అడిగే సంక్లిష్టమైన ప్రశ్నలు తమను ఆశ్చర్యపరుస్తాయని వారు పేర్కొన్నారు. చిన్న వయసులోనే అపారమైన జ్ఞానాన్ని సొంతం చేసుకున్న అర్జున్ ప్రయాణం ఎందరికో స్ఫూర్తిగా నిలుస్తోంది.