కేరళ మాజీ సీఎం విజయన్ ఇంటికి నోటీసులు అతికించిన ఈడీ

కేరళ మాజీ ముఖ్యమంత్రి, ప్రస్తుత ప్రతిపక్ష నేత పినరయి విజయన్‌కు ఎన్‌ఫోర్స్‌మెంట్ డైరెక్టరేట్ (ఈడీ) సమన్లు జారీ చేసింది. కొచ్చిన్ మినరల్స్ అండ్ రూటైల్ లిమిటెడ్ (సీఎంఆర్‌ఎల్)కు సంబంధించిన మనీలాండరింగ్ కేసులో భాగంగా అక్టోబర్ 23న విచారణకు హాజరుకావాలని ఆదేశించింది. విజయన్ ఇంట్లో అందుబాటులో లేకపోవడంతో, అధికారులు ఆయన నివాసం గోడకు నోటీసును అంటించారు.

ఈరోజు కొచ్చి నుంచి వచ్చిన ఈడీ అధికారులు తిరువనంతపురంలోని బేకరీ జంక్షన్ వద్ద ఉన్న పినరయి విజయన్ నివాసానికి వెళ్లారు. ఆ సమయంలో ఆయన ఇంట్లో లేకపోవడంతో, అక్కడి సిబ్బంది నోటీసులు తీసుకునేందుకు నిరాకరించారు. దీంతో, అధికారులు ప్రివెన్షన్ ఆఫ్ మనీ లాండరింగ్ యాక్ట్ (పీఎంఎల్‌ఏ) కింద జారీ చేసిన సమన్లను ఇంటి ప్రవేశ ద్వారం వద్ద అతికించి వెళ్లారు.

విజయన్ కుమార్తె వీణకు చెందిన ఎక్సాలాజిక్ సొల్యూషన్స్ అనే కంపెనీకి ఐటీ సేవల పేరుతో సీఎంఆర్‌ఎల్ సుమారు రూ. 2.78 కోట్లు అక్రమంగా చెల్లించిందనే ఆరోపణలపై ఈడీ కేసు నమోదు చేసి దర్యాప్తు చేస్తోంది. ఈ నేపథ్యంలోనే విజయన్‌ను విచారించాలని నిర్ణయించింది.

అయితే, ఈడీ చర్యను సీపీఎం సీనియర్ నేత వి. శివన్‌కుట్టి తప్పుపట్టారు. విజయన్ కన్నూర్‌లో పార్టీ సమావేశంలో ఉన్నారని, ఆయన పరారీలో లేరని స్పష్టం చేశారు. ఆచూకీ లేనప్పుడు నోటీసులు అంటించడం చట్ట ప్రకారం సరైనదే అయినా, ఆయన ఎక్కడ ఉన్నారో స్పష్టంగా తెలిసినప్పుడు ఈ విధానం సరికాదని ఆయన విమర్శించారు.