జంతర్ మంతర్ వద్ద హైటెన్షన్.. సీజేపీ ఆందోళనపై పోలీసుల ఉక్కుపాదం

ప్రధాన ఎన్నికల కమిషనర్ (సీఈసీ) జ్ఞానేశ్ కుమార్ రాజీనామాను డిమాండ్ చేస్తూ కాక్రోచ్ జనతా పార్టీ (సీజేపీ) శనివారం ఢిల్లీలో తలపెట్టిన నిరసనను పోలీసులు భగ్నం చేశారు. జంతర్ మంతర్ వద్ద చేపట్టాలనుకున్న ఆందోళనకు అనుమతి లేకపోవడంతో, నగరం మొత్తం అప్రమత్తమైంది. ఈ క్రమంలో పలువురు మాజీ ముఖ్యమంత్రులు, ఇతర విపక్ష నేతలతో పాటు వేలాది మంది కార్యకర్తలను పోలీసులు అదుపులోకి తీసుకున్నారు.

ఈ నిరసన నేపథ్యంలో ఢిల్లీ పోలీసులు భారీ భద్రతా ఏర్పాట్లు చేశారు. బీఎన్‌ఎస్‌ఎస్ సెక్షన్ 163 కింద నిషేధాజ్ఞలు విధించి, సుమారు 35 వేల మంది పోలీసు, పారామిలటరీ సిబ్బందిని మోహరించారు. నగరాన్ని 20 జోన్లుగా విభజించి, జంతర్ మంతర్ వైపు వెళ్లే అన్ని మార్గాలను మూసివేశారు. మెట్రో, రైళ్ల రాకపోకలపై కఠిన ఆంక్షలు విధించారు. నిరసనలో పాల్గొనేందుకు వస్తున్న వారిని ఎక్కడికక్కడ అడ్డుకుని అరెస్ట్ చేశారు. సీజేపీ నేతలు అభిజీత్ దిప్కే, అశుతోష్ రంకా, సౌరవ్ దాస్‌లను విమానాశ్రయంలోనే అదుపులోకి తీసుకున్నారు.

మాజీ సీఎంలు అరవింద్ కేజ్రీవాల్, మమతా బెనర్జీ, పినరయి విజయన్, మాణిక్ సర్కార్‌తో పాటు బృందా కరత్, డెరిక్ ఓ’బ్రయన్ వంటి ప్రముఖులను సైతం పోలీసులు అదుపులోకి తీసుకున్నారు. మొత్తం 2,500 మందిని అరెస్ట్ చేశామని పోలీసులు చెప్పగా, 15,000 మందికి పైగా తమ కార్యకర్తలను అక్రమంగా నిర్బంధించారని సీజేపీ ఆరోపించింది. కొన్నిచోట్ల జరిగిన రాళ్ల దాడిలో ఓ డీసీపీ చేయి విరగగా, మరికొందరు పోలీసులకు గాయాలయ్యాయి. అదుపులోకి తీసుకున్న వారిని వివిధ స్టేడియాలకు తరలించి, రాత్రి 9 గంటలకు విడుదల చేసినట్లు పోలీసులు తెలిపారు. సీజేపీ తమ నిరసనలు కొనసాగిస్తుందని, సోమవారం కాంగ్రెస్, ఇండియా కూటమి పార్టీలు కూడా మార్చ్ నిర్వహించనున్నాయని ప్రకటించడంతో ఢిల్లీలో భద్రతను మరికొన్ని రోజులు కొనసాగించే అవకాశం ఉంది.