జియో నుంచి ఏఐ స్మార్ట్ గ్లాసెస్.. కళ్లతోనే యూపీఐ పేమెంట్లు!

టెక్నాలజీ ప్రపంచంలో సరికొత్త సంచలనానికి రిలయన్స్ జియో తెరతీసింది. కృత్రిమ మేధ (AI)ను స్మార్ట్‌ఫోన్లకు మాత్రమే పరిమితం చేయకుండా, రోజువారీ వినియోగించే వస్తువుల్లోకి తీసుకువచ్చే ప్రయత్నంలో భాగంగా ఏఐ ఆధారిత స్మార్ట్ గ్లాసెస్, ఆడియో వేరబుల్స్‌ను ఆవిష్కరించింది. ఢిల్లీలో జరుగుతున్న ఇండియా మొబైల్ కాంగ్రెస్ (IMC) 2026 వేదికగా ఈ ఉత్పత్తులను ప్రదర్శించింది. వీటిలో అత్యంత ప్రధాన ఆకర్షణగా వాయిస్ కమాండ్‌తో యూపీఐ చెల్లింపులు చేసే ఫీచర్ నిలిచింది.

జియో పెవిలియన్‌లో ఏర్పాటు చేసిన డెమోలో, ఈ టెక్నాలజీ ఎలా పనిచేస్తుందో చూపించారు. వినియోగదారులు తమ జియో స్మార్ట్ గ్లాసెస్‌తో వ్యాపారి వద్ద ఉన్న క్యూఆర్ కోడ్‌ వైపు చూసి, వాయిస్ కమాండ్ ద్వారా దాన్ని స్కాన్ చేయమని ఏఐ అసిస్టెంట్‌ను ఆదేశించాలి. వెంటనే ఏఐ ఆ క్యూఆర్‌ కోడ్‌ను స్కాన్ చేసి, లావాదేవీని ప్రారంభిస్తుంది. డబ్బు పంపే ముందు, యూజర్ నుంచి వాయిస్ కన్ఫర్మేషన్ తీసుకున్న తర్వాతే యూపీఐ ఆధారంగా చెల్లింపు పూర్తిచేస్తుంది. అయితే, ఇది ప్రస్తుతం ప్రయోగాత్మక దశలోనే ఉందని, పూర్తిస్థాయిలో ఎప్పుడు అందుబాటులోకి వస్తుందనే వివరాలను జియో వెల్లడించలేదు. భద్రతా ప్రమాణాలు, లావాదేవీల పరిమితి వంటి సాంకేతిక అంశాలపై స్పష్టత రావాల్సి ఉంది.

మరెన్నో అద్భుత ఫీచర్లు..

ఈ ఏఐ గ్లాసెస్ (జియోఫ్రేమ్స్) కేవలం చెల్లింపులకే పరిమితం కాదు. వీటితో చేతుల ప్రమేయం లేకుండానే హెచ్‌డీ క్వాలిటీతో ఫొటోలు తీయవచ్చు, వీడియోలు రికార్డ్ చేయవచ్చు. అంతేకాదు, సోషల్ మీడియాలో లైవ్ స్ట్రీమింగ్ కూడా చేయవచ్చు. ప్రయాణాల్లో, షాపింగ్ సమయంలో భాషాపరమైన అడ్డంకులను తొలగించేందుకు ఈ గ్లాసెస్‌లో ప్రత్యేక ఫీచర్ ఉంది. ఇది ఏకంగా 12 భారతీయ భాషలను రియల్ టైంలో అనువదించగలదు.

ఓపెన్-ఇయర్ ఆడియో టెక్నాలజీతో కాల్స్ మాట్లాడటం, సంగీతం వినడం వంటివి చేయవచ్చు. ఈ టెక్నాలజీ వల్ల బయటి పరిసరాల్లోని శబ్దాలు కూడా స్పష్టంగా వినిపిస్తాయి. "హలో జియో" అని చెప్పి వాయిస్ అసిస్టెంట్‌ను యాక్టివేట్ చేయడం ద్వారా మీటింగ్స్ షెడ్యూల్ చేయడం, టాస్క్‌లు సెట్ చేయడం, రిమైండర్లు పెట్టుకోవడం వంటి పనులు సులభంగా చేసుకోవచ్చు. విద్యార్థులకు చదువులో, పరిశోధనలో కూడా ఈ గ్లాసెస్ అసిస్టెంట్‌గా పనిచేస్తాయి.

ఈ కొత్త వేరబుల్స్ అన్నీ "జియోరియాలిటీఓఎస్" అనే ప్రత్యేక సాఫ్ట్‌వేర్‌పై పనిచేస్తాయి. జియోఫ్రేమ్స్, ఆడియో ఫ్రేమ్స్, టీడబ్ల్యూఎస్ ఇయర్‌బడ్స్ అనే మూడు కేటగిరీలలో ఈ ఉత్పత్తులను తీసుకురానున్నట్లు జియో తెలిపింది. స్మార్ట్‌ఫోన్ ఆవల కృత్రిమ మేధను ప్రతి ఒక్కరి దైనందిన జీవితంలోకి తీసుకురావడమే తమ లక్ష్యమని కంపెనీ స్పష్టం చేసింది.