రూపాయి పతనానికి చెక్‌ పెట్టేందుకు ఆర్‌బీఐ కీలక చర్యలు.. డాలర్ల సరఫరాకు ప్రత్యేక ఏర్పాట్లు!

రూపాయి విలువ పడిపోకుండా చూసేందుకు రిజర్వ్‌ బ్యాంక్‌ ఆఫ్‌ ఇండియా (ఆర్‌బీఐ) కీలక చర్యలు చేపట్టింది. ప్రభుత్వ రంగానికి చెందిన మూడు చమురు కంపెనీలకు అవసరమైన డాలర్లను అందించేందుకు ప్రత్యేక ఏర్పాట్లు చేసింది. ఈ నెల 12 నుంచి తదుపరి ఆదేశాలు వచ్చే వరకు ఈ సదుపాయం అందుబాటులో ఉంటుంది.

ఇండియన్‌ ఆయిల్‌, హిందుస్థాన్‌ పెట్రోలియం, భారత్‌ పెట్రోలియం కంపెనీలకు రోజూ డాలర్లు అవసరమవుతాయి. విదేశాల నుంచి ముడి చమురు కొనాలంటే డాలర్లలోనే చెల్లింపులు చేయాలి. అందుకే ఈ మూడు కంపెనీలకు అవసరమైన డాలర్లను ప్రత్యేక ఏర్పాట్ల ద్వారా అందించాలని ఆర్‌బీఐ నిర్ణయించింది.

మరోవైపు, డాలర్ల కొనుగోలు, అమ్మకాలకు సంబంధించిన లావాదేవీలపైనా ఆర్‌బీఐ కొన్ని ఆంక్షలు విధించింది. డాలర్‌ విలువలో వచ్చే మార్పుల వల్ల నష్టాలు రాకుండా చేసుకునేందుకు చేసే ఒప్పందాల విషయంలో ఈ నిబంధనలు వర్తిస్తాయి. ఒకే లావాదేవీకి సంబంధించి వేర్వేరు బ్యాంకుల ద్వారా రక్షణ పొందే ప్రయత్నాలను నియంత్రించనుంది. అలాగే, అసలు వ్యాపార అవసరం లేకుండా చేసే కొన్ని లావాదేవీల పరిమితిని కూడా తగ్గించింది.