2027 ప్రపంచకప్‌కు భారీ డిమాండ్.. లక్షల్లో టికెట్ దరఖాస్తులు

2027లో జరగనున్న ఐసీసీ పురుషుల క్రికెట్ వన్డే ప్రపంచకప్‌పై అంచనాలు అప్పుడే ఆకాశాన్ని తాకుతున్నాయి. టికెట్ బ్యాలెట్ ప్రారంభమైన మూడు రోజుల్లోనే పది లక్షలకు పైగా దరఖాస్తులు వెల్లువెత్తడం ఈ మెగా టోర్నీ క్రేజ్‌కు నిదర్శనంగా నిలుస్తోంది. దక్షిణాఫ్రికా, జింబాబ్వే, నమీబియా సంయుక్తంగా ఆతిథ్యమిస్తున్న ఈ క్రీడా సంబరానికి ప్రపంచవ్యాప్తంగా అపూర్వ స్పందన లభిస్తోంది.

ఐసీసీ మంగళవారం వెల్లడించిన గణాంకాల ప్రకారం, ఇప్పటికే 3.2 లక్షల మంది అభిమానులు రిజిస్టర్ చేసుకోగా, మొత్తం 11 లక్షల టికెట్ల కోసం దరఖాస్తులు అందాయి. ఎప్పటిలాగే భారత్-పాకిస్థాన్ పోరుకు అత్యధికంగా 1.10 లక్షల దరఖాస్తులు వచ్చాయి. ఆ తర్వాత భారత్-దక్షిణాఫ్రికా మ్యాచ్‌కు 92,000, భారత్-ఆస్ట్రేలియా మ్యాచ్‌కు 86,000 దరఖాస్తులు వెల్లువెత్తాయి. నవంబర్ 21న జరిగే ఫైనల్ మ్యాచ్ కోసం కూడా సుమారు 69,000 మంది దరఖాస్తు చేసుకోవడం విశేషం.

ఈ భారీ స్పందనపై ఐసీసీ సీఈఓ సంజోగ్ గుప్తా స్పందిస్తూ, "కేవలం 48 గంటల్లోనే 10 లక్షల టికెట్ దరఖాస్తులు రావడం ప్రపంచకప్‌‌కున్న ఆదరణను ప్రతిబింబిస్తోంది. రెండు దశాబ్దాల సుదీర్ఘ విరామం తర్వాత ఆఫ్రికా ఖండంలో ఈ టోర్నీ నిర్వహిస్తుండటం ఆఫ్రికా సత్తాను ప్రపంచానికి చాటేందుకు ఒక చక్కని తరుణం" అని పేర్కొన్నారు.

స్థానిక ఆర్గనైజింగ్ కమిటీ సీఈఓ ఖొండిసా ఎంగ్వెన్యా మాట్లాడుతూ, ఈ స్థాయి స్పందన టోర్నీపై నెలకొన్న ఆసక్తికి నిదర్శనమని అభివర్ణించారు. "ప్రపంచవ్యాప్తంగా ఉన్న అభిమానులకు దక్షిణాఫ్రికా, జింబాబ్వే, నమీబియా దేశాలు సాదర స్వాగతం పలుకుతున్నాయి. మా ప్రాంతీయ సంస్కృతిని, ఆతిథ్యాన్ని ప్రపంచానికి పరిచయం చేసేందుకు సిద్ధంగా ఉన్నాం" అని ఆయన తెలిపారు. 

కాగా, 2027 ప్రపంచకప్ టికెట్ల కోసం ఆసక్తి గల అభిమానులు నవంబర్ 21 వరకు టికెట్ బ్యాలెట్‌లో తమ పేర్లను నమోదు చేసుకోవచ్చు.