సమంత ఇన్‌స్టా పోస్ట్ వైరల్.. సమాజం తీరుపై ఘాటు వ్యాఖ్యలు

టాలీవుడ్ నటి సమంత సోషల్ మీడియా వేదికగా మరోసారి ఆలోచింపజేసే పోస్ట్ చేశారు. సమాజంలో పాతుకుపోయిన ద్వంద్వ నీతిని, పక్షపాత ధోరణిని ప్రశ్నిస్తూ ఆమె ఇన్‌స్టాగ్రామ్‌లో పంచుకున్న ఓ పోస్ట్ ప్రస్తుతం వైరల్‌గా మారింది. ఈ పోస్ట్‌కు సమంత "మనం ఇప్పటికైనా మారొచ్చు" అనే క్యాప్షన్‌ను జోడించి, సమాజంలో మార్పు రావాల్సిన అవసరాన్ని నొక్కి చెప్పారు.

ఆమె షేర్ చేసిన పోస్ట్‌లోని వాక్యాలు సమాజం తీరును సూటిగా ప్రశ్నించేలా ఉన్నాయి. "మనం వేశ్యలను నిందిస్తాం, కానీ వారి వద్దకు వెళ్లే కస్టమర్లను కాదు. ఒంటరి తల్లులను వేలెత్తి చూపిస్తాం, కానీ బాధ్యతలేని తండ్రులను ఏమీ అనం. అత్యాచార బాధితురాలిని ప్రశ్నిస్తాం, కానీ ఆ దారుణానికి పాల్పడిన వ్యక్తి గురించి మౌనంగా ఉంటాం. నిజాన్ని కప్పిపుచ్చిన వారిని వదిలేసి, ధైర్యంగా మాట్లాడిన వారిపైనే ప్రశ్నల వర్షం కురిపిస్తాం" వంటి పదునైన వ్యాఖ్యలు ఈ పోస్ట్‌లో ఉన్నాయి.

సమంత కేవలం సినిమాలకు పరిమితం కాకుండా సామాజిక అంశాలపై తన అభిప్రాయాలను నిర్మొహమాటంగా పంచుకుంటూ ఉంటారు. మహిళల సమస్యలు, మానసిక ఆరోగ్యం వంటి విషయాలపై తరచూ స్పందిస్తుంటారు. ఈ క్రమంలోనే ఆమె పెట్టిన తాజా పోస్ట్ నెట్టింట చర్చనీయాంశమైంది. సమాజంలోని లోపాలను ధైర్యంగా ఎత్తిచూపారని పలువురు నెటిజన్లు సమంతను ప్రశంసిస్తూ కామెంట్లు పెడుతున్నారు.