భారత హాకీ అధికారిపై లైంగిక వేధింపుల ఆరోపణలు.. వెనక్కి పంపిన కమిటీ!

జపాన్‌లో జరుగుతున్న ఆసియా క్రీడల్లో తీవ్రమైన ఆరోపణలు ఎదుర్కొన్న భారత హాకీ అంపైర్, టెక్నికల్ అధికారి గుర్వీందర్ సింగ్ సంఘాను టోర్నీ మధ్యలోనే స్వదేశానికి పంపించారు. ఆయనపై లైంగిక వేధింపుల ఫిర్యాదులు రావడంతో అధికారులు ఈ నిర్ణయం తీసుకున్నారు.

ఈ క్రీడల కోసం ఆసియా హాకీ ఫెడరేషన్ (ఏహెచ్ఎఫ్) సంఘాను అంపైర్ మేనేజర్‌గా నియమించింది. అయితే, మలేషియాకు చెందిన ఒక మహిళా హాకీ అధికారి ఆయనపై లైంగిక వేధింపుల ఫిర్యాదు చేశారు. శిక్షణ (మెంటరింగ్) పేరుతో సంఘా తన పట్ల అనుచితంగా ప్రవర్తించారని, అసభ్యంగా తాకారని ఆమె తన ఫిర్యాదులో పేర్కొన్నారు. దీనితో పాటు, అంపైర్లు బస చేసిన హోటల్‌ సిబ్బందితోనూ ఆయన దురుసుగా ప్రవర్తించినట్లు మరో ఫిర్యాదు అందింది.

ఈ పరిణామాల నేపథ్యంలో సెప్టెంబర్ 30వ తేదీనే సంఘా నగోయా నుంచి వెనుదిరిగాడు. ఈ ఉదంతంపై హాకీ ఇండియా స్పందిస్తూ, "ఏహెచ్ఎఫ్ నుంచి ప్రతికూల నివేదిక అందిన పక్షంలో అతనిపై కచ్చితంగా కఠిన చర్యలు తీసుకుంటాం. ఇందులో ఎటువంటి సందేహం లేదు. అతను దోషిగా తేలితే విడిచిపెట్టే ప్రసక్తే లేదు" అని హాకీ ఇండియా అధికారి ఒకరు పీటీఐకి తెలిపారు.

54 ఏళ్ల గుర్వీందర్ సింగ్‌పై గతంలోనూ ఇటువంటి ఆరోపణలు రావడం గమనార్హం. 2025లో రాంచీలో జరిగిన హాకీ ఇండియా లీగ్ సందర్భంగా ఒక మహిళా అంపైర్ ఆయనపై ఫిర్యాదు చేశారు.