పండగ సీజన్‌లో వాణిజ్య గ్యాస్ సిలిండర్‌పై వడ్డన.. వ్యాపారులపై అదనపు భారం

దేశవ్యాప్తంగా పండగల సీజన్ ప్రారంభమవుతున్న తరుణంలో వాణిజ్య వినియోగదారులపై పెను భారం పడింది. 19 కిలోల కమర్షియల్ ఎల్‌పీజీ సిలిండర్ ధరను ఆయిల్ మార్కెటింగ్ కంపెనీలు మరోసారి పెంచాయి. ఈ కొత్త ధరలు అక్టోబర్ 1వ తేదీ నుంచే అమల్లోకి వచ్చాయి. అయితే, గృహ వినియోగదారులకు ఊరటనిస్తూ 14.2 కిలోల డొమెస్టిక్ సిలిండర్ ధరలో మాత్రం ఎలాంటి మార్పు చేయలేదు.

తాజా పెంపుతో దేశ రాజధాని ఢిల్లీలో 19 కిలోల వాణిజ్య సిలిండర్‌పై రూ. 62.50 పెరిగింది. దీంతో అక్కడ సెప్టెంబర్‌లో రూ. 2,747.50గా ఉన్న ధర ఇప్పుడు రూ. 2,810కి చేరింది. ముంబైలో రూ. 63 పెంపుతో సిలిండర్ ధర రూ. 2,701 నుంచి రూ. 2,764కి పెరిగింది. చెన్నైలో రూ. 66.50 పెరగడంతో కొత్త ధర రూ. 2,983గా నమోదైంది. అలాగే హైద‌రాబాద్‌లో రూ. 69 పెర‌గ‌డంతో రూ.3065కి చేరింది

ఇతర నగరాలతో పోలిస్తే పాట్నాలో అత్యధికంగా రూ. 71.50 మేర ధర పెరిగింది. దీంతో అక్కడ సిలిండర్ ధర రూ. 3,029 నుంచి రూ. 3,100.50కి చేరింది. లక్నోలో రూ. 62.50 పెంపుతో సిలిండర్ ధర రూ. 2,932.50కి పెరిగింది. అహ్మదాబాద్‌లో రూ. 2,831.50, కన్యాకుమారిలో రూ. 3,046, లేహ్‌లో రూ. 3,450గా కమర్షియల్ సిలిండర్ ధరలు ఉన్నాయి.

గృహ వినియోగదారులకు ఊరట 
ఈ ధరల పెంపు కేవలం వాణిజ్య సిలిండర్లకు మాత్రమే పరిమితం కావడం గమనార్హం. ఇళ్లలో వాడే 14.2 కిలోల డొమెస్టిక్ సిలిండర్ ధర యథాతథంగా కొనసాగుతోంది. ఢిల్లీలో డొమెస్టిక్ సిలిండర్ ధర రూ. 942 వద్దే స్థిరంగా ఉండగా, ముంబైలో రూ. 941.50, చెన్నైలో రూ. 957.50, హైద‌రాబాద్‌లో రూ. 994గా ఉంది. దీంతో సామాన్య ప్రజలకు ఊరట లభించినట్లయింది.

ఈ పెంపు హోటళ్లు, రెస్టారెంట్లు, క్యాటరింగ్ సర్వీసులు, ఇతర వాణిజ్య సంస్థలపై ప్రత్యక్ష ప్రభావం చూపనుంది. అంతర్జాతీయ మార్కెట్‌లో ముడిచమురు ధరలు, డాలర్‌తో రూపాయి మారకం విలువ ఆధారంగా ప్రతి నెలా ఆయిల్ కంపెనీలు ఎల్‌పీజీ ధరలను సవరిస్తుంటాయి. పండగల సీజన్‌లో ఈ పెంపు కారణంగా బయట ఆహార పదార్థాల ధరలు పెరిగే అవకాశం ఉందని విశ్లేషకులు అంచనా వేస్తున్నారు.