వెస్టిండీస్ ఓపెనర్ గ్రీవ్స్ సెంచరీ.. టీమిండియా ముందు భారీ టార్గెట్

వెస్టిండీస్‌తో జరుగుతున్న తొలి వన్డేలో టీమిండియా ముందు భారీ లక్ష్యం నిలిచింది. తిరువనంతపురం గ్రీన్‌ఫీల్డ్ స్టేడియం వేదికగా జరుగుతున్న ఈ మ్యాచ్‌లో మొదట బ్యాటింగ్ చేసిన వెస్టిండీస్, నిర్ణీత 50 ఓవర్లలో 7 వికెట్ల నష్టానికి 295 పరుగుల స్కోరు సాధించింది. ఓపెనర్ జస్టిన్ గ్రీవ్స్ (101) అద్భుత సెంచరీతో కదం తొక్కగా, స్పిన్నర్ కుల్దీప్ యాదవ్ (4/40) నాలుగు వికెట్లతో విండీస్ ను కట్టడి చేశాడు.

ఈ మ్యాచ్‌లో టాస్ గెలిచిన టీమిండియా కెప్టెన్ శుభ్ మన్ గిల్ ఫీల్డింగ్ ఎంచుకున్నాడు. అయితే, అతని నిర్ణయం సరైంది కాదేమో అన్నట్లుగా విండీస్ ఓపెనర్లు జాన్ క్యాంప్‌బెల్ (62), జస్టిన్ గ్రీవ్స్ ఆకాశమే హద్దుగా చెలరేగారు. భారత బౌలర్లను సమర్థంగా ఎదుర్కొంటూ తొలి వికెట్‌కు 135 పరుగుల భారీ భాగస్వామ్యం నెలకొల్పారు. ఈ క్రమంలో క్యాంప్‌బెల్ దూకుడుగా ఆడి హాఫ్ సెంచరీ పూర్తి చేసుకున్నాడు.

భారీ భాగస్వామ్యంతో ప్రమాదకరంగా మారుతున్న ఈ జోడీని కుల్దీప్ యాదవ్ విడదీశాడు. క్యాంప్‌బెల్‌ను ఔట్ చేసి భారత్‌కు తొలి వికెట్ అందించాడు. ఆ తర్వాత తన స్పిన్ మాయాజాలంతో విండీస్ మిడిలార్డర్‌ను దెబ్బతీశాడు. కెప్టెన్ షాయ్ హోప్ (12), సెంచరీ హీరో జస్టిన్ గ్రీవ్స్, జ్యువెల్ ఆండ్రూ (0)లను స్వల్ప వ్యవధిలో పెవిలియన్ పంపాడు. దీంతో, 176/2 స్కోరుతో పటిష్ఠంగా ఉన్న విండీస్.. కుల్దీప్ విజృంభణతో 198/5కి చేరింది.

ఒక దశలో విండీస్ 250 పరుగులు కూడా చేయలేదనిపించినా.. చివర్లో అమీర్ జంగూ (58 నాటౌట్) అద్భుతంగా ఆడాడు. కేవలం 43 బంతుల్లో 7 ఫోర్లు, ఒక సిక్సర్‌తో అజేయ హాఫ్ సెంచరీ సాధించి జట్టు స్కోరును 295 పరుగులకు చేర్చాడు. భారత బౌలర్లలో కుల్దీప్ యాదవ్ 4 వికెట్లు తీయగా, ప్రసిద్ధ్ కృష్ణ 2, నితీశ్ రెడ్డి ఒక వికెట్ పడగొట్టారు.