ఆసియా క్రీడల క్రికెట్: భారత్-ఆఫ్ఘన్ క్వార్టర్ ఫైనల్‌కు వాన గండం

ఆసియా క్రీడల క్రికెట్ ఈవెంట్‌లో సోమవారం జరగనున్న క్వార్టర్ ఫైనల్ మ్యాచ్‌పై వర్షం ముప్పు పొంచి ఉంది. డిఫెండింగ్ ఛాంపియన్ భారత్, ద్వితీయ శ్రేణి ఆఫ్ఘనిస్థాన్ జట్టుతో తలపడనుండగా, ఈ మ్యాచ్‌కు వరుణుడు అడ్డుపడే అవకాశాలు ఎక్కువగా ఉన్నాయి. ఒకవేళ వర్షం కారణంగా మ్యాచ్ రద్దయితే, మెరుగైన ర్యాంకు ఆధారంగా టీమిండియా నేరుగా సెమీఫైనల్‌కు అర్హత సాధిస్తుంది.

నిషిన్‌లోని కొరోగి స్పోర్ట్స్ పార్క్ ఈ కీలక పోరుకు వేదిక కానుంది. భారత కాలమానం ప్రకారం ఉదయం 10 గంటలకు (స్థానిక కాలమానం ప్రకారం మధ్యాహ్నం 1:30) భారత్-ఆఫ్ఘన్ మ్యాచ్ ప్రారంభం కావాల్సి ఉంది. దీనికి ముందు ఉదయం 5:30 గంటలకు (స్థానిక కాలమానం ప్రకారం 9 గంటలకు) పాకిస్థాన్, హాంకాంగ్ చైనా మధ్య తొలి క్వార్టర్ ఫైనల్ జరగనుంది. అయితే వాతావరణ సూచనల ప్రకారం, సోమవారం అక్కడ 97 శాతం వర్షపాతం నమోదయ్యే అవకాశం ఉండటంతో రెండు మ్యాచ్‌ల నిర్వహణపై సందేహాలు నెలకొన్నాయి.

ప్రైవేటు వాతావరణ సంస్థ 'ఆక్యువెదర్' నివేదిక ప్రకారం, పాకిస్థాన్ మ్యాచ్ ప్రారంభమయ్యే సమయానికి 70 శాతం, భారత్ మ్యాచ్ టాస్ సమయానికి 40 శాతం వర్షం పడే సూచనలు ఉన్నాయి. రోజంతా వర్షం కురిసే అవకాశాలు ఎక్కువగా ఉండటంతో మ్యాచ్‌లు సజావుగా సాగడం కష్టంగా మారింది. నిబంధనల ప్రకారం, నాకౌట్ మ్యాచ్‌లు వర్షం కారణంగా రద్దయితే, ఐసీసీ ర్యాంకింగ్స్‌లో ముందున్న జట్లను విజేతలుగా ప్రకటిస్తారు.

ఐసీసీ టీ20 ర్యాంకింగ్స్‌లో భారత్ నంబర్ వన్ స్థానంలో ఉండగా, ఆఫ్ఘనిస్థాన్ 10వ ర్యాంకులో ఉంది. అదేవిధంగా, పాకిస్థాన్ 6వ స్థానంలో, హాంకాంగ్ చైనా 24వ స్థానంలో కొనసాగుతున్నాయి. ఈ లెక్కన మ్యాచ్‌లు రద్దయితే భారత్, పాకిస్థాన్ జట్లు సెమీఫైనల్‌కు చేరుకుంటాయి. గతంలో 2023 ఆసియా క్రీడల ఫైనల్‌లోనూ భారత్, ఆఫ్ఘనిస్థాన్ మధ్య జరిగిన ఫైనల్ మ్యాచ్ వర్షం కారణంగా రద్దవ్వగా, మెరుగైన ర్యాంకు ఆధారంగా టీమిండియా స్వర్ణ పతకాన్ని కైవసం చేసుకోవడం గమనార్హం.