కోనేరులో స్నానం చేస్తూ ముగ్గురు స్నేహితుల మృతి

విజయనగరం జిల్లాలో హృదయవిదారక ఘటన చోటుచేసుకుంది. మెరకముడిదాం మండలం బుధరాయవలస గ్రామంలోని కోనేరులో స్నానానికి వెళ్లిన ముగ్గురు చిన్నారులు ప్రమాదవశాత్తు నీట మునిగి ప్రాణాలు కోల్పోయారు. మృతులంతా ఏడేళ్ల లోపు వారే కావడంతో స్థానికంగా తీవ్ర విషాదం నెలకొంది.

బుధరాయవలస గ్రామానికి చెందిన శంకరపు వెంకటేశ్ (7), సారిది చందు (7), మండల హేమచంద్రరావు (7) అనే ముగ్గురు స్నేహితులు గ్రామంలోని కోనేరు వద్దకు స్నానం చేసేందుకు వెళ్లారు. అయితే, నీటి లోతును అంచనా వేయలేక వారు ప్రమాదవశాత్తు నీటిలో మునిగిపోయారు. చిన్నారులు ఎంతసేపటికీ తిరిగి రాకపోవడంతో ఆందోళన చెందిన కుటుంబ సభ్యులు, గ్రామస్థులు కోనేరు వద్ద గాలించగా వారి మృతదేహాలు లభ్యమయ్యాయి.

ఒకే గ్రామానికి చెందిన ముగ్గురు చిన్నారులు ఒకేసారి మృతి చెందడంతో బుధరాయవలసలో విషాదఛాయలు అలుముకున్నాయి. చిన్నారుల తల్లిదండ్రులు, కుటుంబ సభ్యుల రోదనలతో గ్రామం శోకసంద్రంలో మునిగిపోయింది. ఈ ఘటనపై సమాచారం అందుకున్న పోలీసులు కేసు నమోదు చేసి దర్యాప్తు చేస్తున్నారు.