హార్దిక్‌ రీఎంట్రీకి బ్రేక్‌.. కొత్త గాయం బయటపడటంతో కీలక సిరీస్‌ మిస్‌!

భారత స్టార్‌ ఆల్‌రౌండర్‌ హార్దిక్‌ పాండ్యా పునరాగమనానికి మరోసారి బ్రేక్‌ పడింది. అతడి కుడి కాలి కింది భాగంలో కొత్తగా గాయం బయటపడింది. దీంతో కనీసం మూడు వారాల పాటు క్రికెట్‌కు దూరంగా ఉండనున్నాడు. ఈ కారణంగా న్యూజిలాండ్‌తో జరిగే టీ20 సిరీస్‌కు కూడా అతడు దూరం కానున్నాడు.

హార్దిక్‌ తాజా స్కాన్‌ రిపోర్టుల్లో కుడి మోకాలు నుంచి చీలమండల వరకు ఉండే ఎముకలో చిన్న గాయం ఉన్నట్లు తేలింది. దీంతో రెండు వారాల పాటు పూర్తిగా విశ్రాంతి తీసుకోవాలని వైద్యులు సూచించారు. బీసీసీఐ వైద్య బృందం అధిపతి డాక్టర్‌ దిన్షా పార్దివాలా అతడి నివేదికలను పరిశీలించారు. జపాన్‌ నుంచి తిరిగొచ్చిన తర్వాత హార్దిక్‌ను పరీక్షించి పునరావాసంపై నిర్ణయం తీసుకోనున్నారు.

హార్దిక్‌ పునరాగమన తేదీని తొలుత సెప్టెంబర్‌ 20గా నిర్ణయించారు. దీంతో అక్టోబర్‌ 6 నుంచి ఆస్ట్రేలియా-ఏతో జరిగే వన్డే సిరీస్‌కు భారత్‌-ఏ జట్టులో అతడికి చోటు కల్పించారు. తాజా గాయంతో ఆ సిరీస్‌ నుంచి తప్పుకోవాల్సి రావడం ఖాయంగా కనిపిస్తోంది.

అక్టోబర్‌ 22 నుంచి న్యూజిలాండ్‌తో టీ20 సిరీస్‌ మొదలవుతుంది. ఆ తర్వాత వన్డే సిరీస్‌ ఉంది. అప్పటిలోగా హార్దిక్‌ పూర్తిస్థాయి ఫిట్‌నెస్‌ సాధించే అవకాశం లేదని బీసీసీఐ వర్గాలు తెలిపాయి.

ఆఫ్ఘనిస్థాన్‌ టీ20 సిరీస్‌కు ముందు ఫీల్డింగ్‌ సాధన చేస్తుండగా హార్దిక్‌కు మోకాలి చుట్టూ నొప్పి వచ్చింది. విశ్రాంతి తీసుకున్న తర్వాత కోలుకున్నట్లు కనిపించినా.. ఫిట్‌నెస్‌ సర్టిఫికెట్‌ తీసుకునే సమయంలో నొప్పి మళ్లీ మొదలైంది. స్కాన్లలో గాయం బయటపడింది.

ఐపీఎల్‌ తర్వాత నుంచి బెంగళూరులోని సెంటర్‌ ఆఫ్‌ ఎక్సలెన్స్‌లో హార్దిక్‌ శిక్షణ తీసుకుంటున్నాడు. గత నాలుగు నెలల్లో ఆఫ్ఘనిస్థాన్‌ వన్డేలు, ఇంగ్లాండ్‌ టీ20లు, ఇప్పుడు ఆస్ట్రేలియా-ఏ సిరీస్‌ సమయంలో అతడికి గాయాలు ఎదురయ్యాయి.

న్యూజిలాండ్‌ సిరీస్‌ కూడా చేజారితే జింబాబ్వేతో జరిగే వన్డేలు హార్దిక్‌కు తదుపరి అవకాశం కావచ్చు. అంతకంటే ముందే విజయ్‌ హజారే ట్రోఫీ లేదా సయ్యద్‌ ముస్తాక్‌ అలీ ట్రోఫీలో ఆడి ఫిట్‌నెస్‌ నిరూపించుకునే అవకాశం ఉంది.