ఐపీఎల్ 2027 వేలానికి వేదిక ఖరారు.. ఈసారి ఇండియాలోనే!

ఇండియన్ ప్రీమియర్ లీగ్ (ఐపీఎల్) 2027 సీజన్‌ వేలంపై భారత క్రికెట్ నియంత్రణ మండలి (బీసీసీఐ) కీలక ప్రకటన చేసింది. ఈ ఏడాది డిసెంబర్‌లో గోవా వేదికగా ఆటగాళ్ల వేలం నిర్వహించనున్నట్లు బీసీసీఐ కార్యదర్శి దేవజిత్ సైకియా బుధవారం స్పష్టం చేశారు. అయితే, వేలానికి సంబంధించిన కచ్చితమైన తేదీలను ఇంకా వెల్లడించాల్సి ఉంది.

గత మూడు పర్యాయాలుగా ఐపీఎల్ వేలం విదేశాల్లోనే జరిగింది. అబుదాబి, దుబాయ్, సౌదీ అరేబియా వంటి నగరాలు ఈ వేలానికి వేదికలుగా నిలిచాయి. అయితే, ఈసారి తిరిగి భారత్‌లోనే వేలం నిర్వహించాలని నిర్ణయించినట్లు సైకియా తెలిపారు. "గత మూడుసార్లు వేలాన్ని అబుదాబి, దుబాయ్, సౌదీ అరేబియాలో నిర్వహించాం. ఈసారి డిసెంబర్‌లో గోవాలో నిర్వహించాలని నిర్ణయించాం" అని ఆయన మీడియాకు వివరించారు.

ఇదే సందర్భంలో బీసీసీఐ మరో కీలక నిర్ణయాన్ని వెల్లడించింది. ఇండియా 'ఏ', ఆస్ట్రేలియా 'ఏ' మహిళా జట్ల మధ్య జరగాల్సిన మల్టీడే మ్యాచ్ వేదికను మార్పు చేశారు. హిమాచల్ ప్రదేశ్‌లోని ధర్మశాలలో భారీ వర్షాలు కురుస్తున్న కారణంగా, ఈ మ్యాచ్‌ను పంజాబ్‌లోని మొహాలీకి తరలించారు. ఈ మ్యాచ్ సెప్టెంబర్ 29 నుంచి అక్టోబర్ 2 వరకు జరగనుంది.