దిశ శాలియాన్ కేసు: రూ.500 కోట్ల నోటీసును తిరస్కరించిన ఆదిత్య థాకరే

టాలెంట్ మేనేజర్ దిశ శాలియాన్ మృతి కేసులో ఆమె తండ్రి సతీశ్ శాలియాన్ పంపిన రూ.500 కోట్ల పరువునష్టం నోటీసును శివసేన (యూబీటీ) నేత ఆదిత్య థాకరే తిరస్కరించారు. ఈ మేరకు తన న్యాయవాది ద్వారా ఆయన 25 పేజీల సుదీర్ఘ వివరణను పంపారు. సెప్టెంబర్ 16న తాను 'ఎక్స్' వేదికగా చేసిన పోస్టుల వల్ల తన పరువుకు భంగం కలిగిందంటూ సతీశ్ శాలియాన్ పంపిన నోటీసులోని ప్రతి ఆరోపణను, డిమాండ్‌ను ఆదిత్య తోసిపుచ్చారు.

ఈ సందర్భంగా ఆదిత్య తన సమాధానంలో పలు కీలక అంశాలను ప్రస్తావించారు. "నేను దిశ శాలియాన్‌ను ఎప్పుడూ కలవలేదు, ఆమె ఎవరో కూడా నాకు తెలియదు" అన్న తన గత వ్యాఖ్యలకు కట్టుబడి ఉన్నానని ఆయన స్పష్టం చేశారు. వివాదాస్పద పోస్టులను తొలగించే ప్రసక్తి లేదని, క్షమాపణలు చెప్పబోనని, ఎలాంటి నష్టపరిహారం చెల్లించేది లేదని ఆయన తేల్చిచెప్పారు. రూ.500 కోట్ల నష్టపరిహారం డిమాండ్ చేయడం కేవలం తనను భయపెట్టే ప్రయత్నమేనని, ఆ ఆరోపణలు నిరాధారమైనవని పేర్కొన్నారు.

బాలీవుడ్ నటుడు సుశాంత్ సింగ్ రాజ్‌పుత్ మాజీ మేనేజర్ దిశ శాలియాన్ (28), 2020 జూన్ 8న ముంబైలోని ఒక భవనం పైనుంచి పడి మరణించారు. తొలుత దీనిని ప్రమాదవశాత్తు జరిగిన మరణంగా లేదా ఆత్మహత్యగా భావించారు. అయితే, ఇటీవలే ఆమె తండ్రి దాఖలు చేసిన పిటిషన్‌పై స్పందించిన బాంబే హైకోర్టు, దీనిని హత్య కేసుగా నమోదు చేసి సీబీఐ దర్యాప్తునకు ఆదేశించింది. ఈ క్రమంలో నమోదైన ఎఫ్‌ఐఆర్‌లో అప్పటి ముఖ్యమంత్రి ఉద్ధవ్ థాకరే, ఆయన కుమారుడు ఆదిత్య థాకరే పేర్లను కూడా చేర్చారు.

మరోవైపు, ఈ కేసు దర్యాప్తు కోసం ఢిల్లీ నుంచి ఒక సీబీఐ అధికారి ముంబై చేరుకున్నారని దిశ తండ్రి తరఫు న్యాయవాది తెలిపారు. సంఘటనా స్థలంలో ఆదిత్య థాకరేను చూశానంటూ ఒక ప్రత్యక్ష సాక్షి ఇచ్చిన వీడియో వాంగ్మూలంతో కూడిన పెన్‌డ్రైవ్‌ను సీబీఐకి అందజేస్తామని ఆయన పేర్కొన్నారు. ఈ నేపథ్యంలో ఆదిత్య థాకరేతో పాటు ముంబై మాజీ పోలీస్ కమిషనర్ పరమ్ బీర్ సింగ్‌లను వెంటనే అరెస్టు చేయాలని వారు డిమాండ్ చేస్తున్నారు.