నెగెటివిటీకి ఈ సినిమానే సమాధానం.. 'ప్యారడైజ్'పై నాని ధీమా

నేచురల్ స్టార్ నాని కథానాయకుడిగా నటించిన యాక్షన్ డ్రామా 'ది ప్యారడైజ్' విడుదలకు సిద్ధమవుతున్న వేళ, చిత్ర బృందం హైదరాబాద్‌లో ప్రీ రిలీజ్ వేడుకను అట్టహాసంగా నిర్వహించింది. ఈ కార్యక్రమానికి ముఖ్య అతిథిగా హాజరైన నాని, సినిమాపై తనకున్న అపారమైన విశ్వాసాన్ని వ్యక్తం చేస్తూ ఉద్వేగభరిత ప్రసంగం చేశారు. 'ప్యారడైజ్' కేవలం ఒక సినిమా కాదని, థియేటర్లలో ప్రేక్షకులకు ఒక పెద్ద సెలబ్రేషన్ అని, ఇది సెప్టెంబర్ 24న ప్రపంచవ్యాప్తంగా ప్రారంభం కానుందని ప్రకటించారు. 

"మనం ఏదైనా మంచి పనిని నిలకడగా చేసినప్పుడు నెగెటివిటీ గురించి ఆలోచించాల్సిన పనిలేదు. సెలబ్రేషన్స్ వాటంతట అవే మొదలవుతాయి," అంటూ తనపై వచ్చే విమర్శలకు పరోక్షంగా సమాధానమిచ్చారు. సెప్టెంబర్ 23 రాత్రి నుంచే థియేటర్లలో 'ప్యారడైజ్' పండగ వాతావరణం తీసుకొస్తుందని ధీమా వ్యక్తం చేశారు. 

ఈ సందర్భంగా నాని.. దర్శకుడు శ్రీకాంత్ ఓదెలపై ప్రశంసల వర్షం కురిపించారు. "శ్రీకాంత్ నాకు తమ్ముడు లాంటివాడు. కానీ అతని పట్టుదల, సినిమాపై అతనికి ఉన్న నమ్మకం చూసినప్పుడు ఒక అన్నలా చూస్తాను. అతని ప్రతిభ చూసి నేను చాలా గర్వపడుతున్నాను. ఈ సినిమాను అతను నాలుగు రెట్లు పెద్దదిగా మార్చాడు" అని నాని భావోద్వేగంగా అన్నారు. తనకెంతో ఇష్టమైన నటుడు రాఘవ్ జుయల్‌ను ప్రత్యేకంగా అభినందించారు. "రాఘవ్ ఈ షోలో నువ్వే రాక్‌స్టార్. నువ్వో అద్భుతమైన ఎంటర్‌టైనర్, ఈరోజు షో మొత్తం నీదే. నీకు ఎలాంటి ప్రిపరేషన్ అవసరం లేదు. నువ్వు భారతీయ సినిమాలో అతిపెద్ద స్టార్‌గా ఎదుగుతావని నాకు పూర్తి నమ్మకం ఉంది. నీకు హైదరాబాద్‌లో ఒక అన్న ఉన్నాడని గుర్తుంచుకో" అని భరోసా ఇచ్చారు.

హీరోయిన్ కయాదు లోహర్ గురించి మాట్లాడుతూ, ఆమె పోషించిన 'సుబ్బు' పాత్రతో ప్రేక్షకులు ప్రేమలో పడతారని ధీమా వ్యక్తం చేశారు. "ఆమెను చాలా కష్టమైన పరిస్థితుల్లో చిత్రీకరణ చేశాం. అయినా ఎంతో గ్రేస్‌తో ఆ పాత్రను అద్భుతంగా పండించింది" అని కొనియాడారు. సినిమాలో ప్రతినాయకుడిగా నటించిన సీనియర్ నటుడు మోహన్ బాబుతో పనిచేయడం గొప్ప అనుభవమని, ఆయన ఒక అద్భుతమైన వ్యక్తి అని తెలిపారు. అలాగే, మరో కీలక పాత్ర పోషించిన సోనాలి ఈ కార్యక్రమానికి రాలేకపోయారని, కానీ సినిమా విడుదలయ్యాక ప్రేక్షకుల నుంచి ఆమె పాత్రకు లభించే ప్రేమను చూసి ఆశ్చర్యపోతారని అన్నారు.

సాంకేతిక బృందానికి, ముఖ్యంగా సంగీత దర్శకుడు అనిరుధ్ రవిచందర్‌కు కృతజ్ఞతలు తెలిపారు. "అనిరుధ్ అందించిన పాట ఇప్పటికే బ్లాక్‌బస్టర్ అయింది. దానికి అద్భుతమైన సాహిత్యం కూడా తోడైంది. మాస్టర్‌కు హ్యాట్సాఫ్" అని అన్నారు.

ఈ క్రమంలో సోషల్ మీడియాలో వచ్చే నెగటివిటీపై కూడా నాని స్పందించారు. "మనం సరైన పని చేస్తున్నప్పుడు, దాన్ని నిలకడగా కొనసాగిస్తున్నప్పుడు నెగటివిటీని పట్టించుకోనవసరం లేదు. మన పనికి వేడుక అదే మొదలవుతుంది. ఈ సినిమానే ఆ సెలబ్రేషన్‌కు నాంది పలుకుతుంది" అని వ్యాఖ్యానించారు. 

టికెట్ ధరల విషయంలోనూ సాధారణ ప్రేక్షకులకు అందుబాటులో ఉండేలా జాగ్రత్తలు తీసుకున్నట్లు పరోక్షంగా సూచించారు. సినిమా సెప్టెంబర్ 24న విడుదలవుతుందని, అయితే 23వ తేదీ రాత్రి నుంచే పెయిడ్ ప్రీమియర్లతో అసలు పండుగ మొదలవుతుందని అభిమానులకు పిలుపునిచ్చారు. ఈ సినిమా ప్రేక్షకులకు ఒక స్పెషల్ గిఫ్ట్ అవుతుందని చెబుతూ తన ప్రసంగాన్ని ముగించారు.

ఇందులో నాని నటన మామూలుగా ఉండదు: కయాదు లోహర్

ఈ కార్యక్రమంలో చిత్ర కథానాయిక కయాదు లోహర్ మాట్లాడుతూ సినిమాపై భారీ అంచనాలను పెంచేలా ఆసక్తికర వ్యాఖ్యలు చేశారు. "అందరికీ నమస్కారం, ఎలా ఉన్నారు?" అంటూ తన ప్రసంగాన్ని తెలుగులో మొదలుపెట్టి అభిమానులను ఆకట్టుకున్నారు. సినిమాకు ప్రేక్షకులు సృష్టించిన హైప్ ఊహకందనిదని, ఈ సినిమా థియేటర్లను బద్దలు కొట్టడం ఖాయమని ధీమా వ్యక్తం చేశారు.

ఈ చిత్రంలో నాని నటన మామూలుగా ఉండదని, ఇప్పటివరకు చూసింది కేవలం ఒక చిన్న గ్లింప్స్ మాత్రమేనని ఆమె అన్నారు. "సెప్టెంబర్ 24న 'జడల్ జమానా' మొదలవబోతోంది. థియేటర్లలో నానిని సరికొత్త అవతార్‌లో చూసి అందరూ ఆశ్చర్యపోతారు. ఆయనతో కలిసి పనిచేయడం గొప్ప అనుభవం. షూటింగ్ అంతటా ఆయన ఎంతో సపోర్ట్‌గా నిలిచారు" అని కొనియాడారు.

దర్శకుడు శ్రీకాంత్ ఓడెల గురించి మాట్లాడుతూ ఆయనొక "క్రేజీ క్రాక్ డైరెక్టర్" అని అభివర్ణించారు. "ఆయనతో పనిచేయడం చాలా కష్టం. కానీ సినిమాపై ఆయనకున్న ప్యాషన్ అలాంటిది. ఆ కష్టం అంతా సినిమా కోసమే. ప్రస్తుతం ఆయన చెన్నైలో ఫైనల్ వర్క్‌లో బిజీగా ఉన్నారు" అని వివరించారు. సంగీత దర్శకుడు అనిరుధ్ అద్భుతమైన ఆల్బమ్ ఇచ్చారని, డీఓపీ సాయి విజువల్స్ అద్భుతంగా ఉంటాయని ప్రశంసించారు.

ఈ సందర్భంగా నిర్మాత సుధాకర్ గారికి, సహనటులు సంపత్, సోనాలి, క్రాంతిలకు ఆమె ధన్యవాదాలు తెలిపారు. నటుడు రాఘవ్ జుయల్ నటనను ప్రత్యేకంగా అభినందిస్తూ, ఈ సినిమా తర్వాత తెలుగు ప్రేక్షకులు అతడిని ఎప్పటికీ గుర్తుంచుకుంటారని అన్నారు. తెలుగు ప్రేక్షకులు చూపించే ప్రేమకు సాటిలేదని, తన పాత్ర 'సుబ్బు'ను, 'ప్యారడైజ్' చిత్రాన్ని కూడా అలాగే ఆదరించాలని కోరారు.