చైనా డిమాండ్.. పాకిస్థాన్‌కు కాసుల పంట పండిస్తున్న గాడిదలు

చైనా నుంచి వస్తున్న భారీ డిమాండ్‌తో పాకిస్థాన్‌లో గాడిదల వ్యాపారం ఊపందుకుంది. గాడిద మాంసం, దాని చర్మంతో తయారు చేసే సంప్రదాయ ఔషధాల కోసం చైనా నుంచి విపరీతమైన గిరాకీ ఉండటంతో పాకిస్థాన్ ఇప్పుడు వాటిని పెద్ద ఎత్తున ఎగుమతి చేస్తోంది. బలూచిస్థాన్ ప్రావిన్స్‌లోని గ్వాదర్ సమీపంలో ఏర్పాటు చేసిన ఒక భారీ స్లాటర్ హౌస్‌లో రోజూ వందల సంఖ్యలో గాడిదలను వధించి, వాటి మాంసం, చర్మాలను చైనాకు పంపిస్తున్నారు.

ఈ స్లాటర్ హౌస్‌ను హ్యాంగెంగ్ గ్రూప్ అనే చైనా కంపెనీ నిర్వహిస్తోంది. ప్రస్తుతం రోజుకు వందల సంఖ్యలో గాడిదలను వధిస్తుండగా, రాబోయే కొన్ని నెలల్లో ఈ సామర్థ్యాన్ని రోజుకు 800కి పెంచాలని లక్ష్యంగా పెట్టుకున్నట్లు కంపెనీ చీఫ్ ఎగ్జిక్యూటివ్ ఆండీ లియావో తెలిపారు. ఈ వ్యాపారం ద్వారా రాబోయే ఆరు నెలల్లో నెలకు సుమారు 5 మిలియన్ డాలర్ల (సుమారు రూ. 47 కోట్లు) విదేశీ మారక ద్రవ్యాన్ని ఆర్జించవచ్చని, రెండేళ్లలో ఇది నెలకు 7 మిలియన్ డాలర్ల (రూ. 67 కోట్లు) కు చేరుకుంటుందని ఆయన అంచనా వేశారు. 

ఈ ప్రాజెక్టు కోసం హ్యాంగెంగ్ గ్రూప్ సుమారు 50 మిలియన్ డాలర్లు (సుమారు రూ. 480 కోట్లు) పెట్టుబడిగా పెట్టింది. దీనివల్ల స్థానికంగా 500 మందికి ఉపాధి లభిస్తోంది. ఇప్పటికే పలు కంటైనర్ల మాంసం, చర్మాలను ఎగుమతి చేయగా, తొలి షిప్‌మెంట్ జూన్‌లో చైనాకు చేరినట్లు కంపెనీ వెల్లడించింది.

ఎందుకీ వ్యాపారం?
మత విశ్వాసాల కారణంగా పాకిస్థాన్‌లో గాడిద మాంసాన్ని తినరు. కానీ, చైనాలోని కొన్ని ప్రాంతాల్లో దీనిని అత్యంత రుచికరమైన ఆహారంగా భావిస్తారు. అంతకంటే ముఖ్యంగా, గాడిద చర్మం నుంచి 'ఇజియావో' అనే కొలాజెన్ అధికంగా ఉండే జిగురు వంటి పదార్థాన్ని తయారు చేస్తారు. దీనిని చైనా సంప్రదాయ వైద్యంలో రక్త వృద్ధికి, రోగనిరోధక శక్తిని పెంచడానికి, నిద్రలేమి సమస్యలకు ఔషధంగా వాడతారు. అంతేకాకుండా, సౌందర్య సాధనాల తయారీలోనూ దీనికి మంచి డిమాండ్ ఉంది.

చైనాలో ఇజియావో కోసం గాడిదలను విపరీతంగా వధించడంతో వాటి జనాభా గణనీయంగా తగ్గిపోయింది. దీంతో అక్కడి కంపెనీలు పాకిస్థాన్, బ్రెజిల్, ఆస్ట్రేలియా వంటి దేశాల వైపు చూస్తున్నాయి. 2023 నాటి యూఎస్ కాంగ్రెషనల్ రీసెర్చ్ సర్వీస్ నివేదిక ప్రకారం, ప్రపంచవ్యాప్తంగా ఏటా 2.3 నుంచి 4.8 మిలియన్ల గాడిదలను కేవలం వాటి చర్మం కోసమే వధిస్తున్నారు. 2021లో చైనా ఇజియావో మార్కెట్ విలువ సుమారు 7.8 బిలియన్ డాలర్లుగా ఉంది.

పాకిస్థాన్‌కు ఆర్థిక వనరుగా..
పాకిస్థాన్ ఎకనమిక్ సర్వే 2025 ప్రకారం.. దేశంలో గాడిదల జనాభా 6 మిలియన్లకు పైగా ఉంది. ఈ భారీ సంఖ్యను ఆర్థిక వనరుగా మార్చుకోవాలని పాక్ ప్రభుత్వం నిర్ణయించింది. గ్వాదర్ ఫ్రీ జోన్ నుంచి అన్ని రకాల ఆరోగ్య నిబంధనలు పాటిస్తూ గాడిద మాంసం, చర్మాల ఎగుమతికి అధికారికంగా అనుమతి ఇచ్చింది. గతంలో చైనాకు గాడిదలను ఎక్కువగా సరఫరా చేసిన ఆఫ్రికా దేశాలు ఇప్పుడు ఈ వ్యాపారంపై ఆంక్షలు విధిస్తున్నాయి. ఈ నేపథ్యంలో పాకిస్థాన్ ఈ మార్కెట్‌లో కీలక పాత్ర పోషించే అవకాశాలు కనిపిస్తున్నాయి.