శ్రీచరణి.. ఆంధ్రప్రదేశ్‌కు గర్వకారణం: టీమిండియాకు నారా లోకేశ్ అభినందనలు

మహిళల టీ20 ఆసియా కప్‌లో భారత జట్టు మరోసారి తన ఆధిపత్యాన్ని నిరూపించుకుంది. దుబాయ్ వేదికగా ఆదివారం రాత్రి జరిగిన ఫైనల్ మ్యాచ్‌లో శ్రీలంకపై 72 పరుగుల భారీ తేడాతో ఘన విజయం సాధించింది. ఈ విజయంతో భారత మహిళల జట్టు రికార్డు స్థాయిలో ఎనిమిదోసారి ఆసియా కప్ టైటిల్‌ను ముద్దాడింది. 2024 ఫైనల్లో లంక చేతిలో ఎదురైన ఓటమికి ఈ గెలుపుతో ప్రతీకారం తీర్చుకుంది.

ఈ చారిత్రక విజయంపై ఏపీ మంత్రి నారా లోకేశ్ భారత జట్టుకు అభినందనలు తెలిపారు. "ఉమెన్స్ ఆసియా కప్ గెలుచుకున్న భారత మహిళల క్రికెట్ జట్టుకు హృదయపూర్వక అభినందనలు. మన ఆంధ్రప్రదేశ్‌కు గర్వకారణమైన శ్రీ చరణి అద్భుతమైన బౌలింగ్‌తో 4 వికెట్లు తీసింది. అద్భుతమైన ఆట తీరు,  టీమ్ స్పిరిట్ తో ఫైనల్ గెలిచి 8వ సారి విజేతగా నిలిచారు" అని ఆయన పేర్కొన్నారు.

కాగా, నిన్న జరిగిన ఫైనల్ మ్యాచ్‌లో టాస్ గెలిచి బ్యాటింగ్ ఎంచుకున్న భారత్ నిర్ణీత 20 ఓవర్లలో 5 వికెట్ల నష్టానికి 183 పరుగుల భారీ స్కోరు చేసింది. ఓపెనర్లు షఫాలీ వర్మ (68), స్మృతి మంధాన (59) అద్భుతమైన హాఫ్ సెంచరీలతో చెలరేగారు. తొలి వికెట్‌కు 129 పరుగుల రికార్డు భాగస్వామ్యం నెలకొల్పి జట్టు భారీ స్కోరుకు బలమైన పునాది వేశారు.

అనంతరం 184 పరుగుల లక్ష్యంతో బరిలోకి దిగిన శ్రీలంక, భారత బౌలర్ల ధాటికి తట్టుకోలేకపోయింది. ఆంధ్రప్రదేశ్‌కు చెందిన లెఫ్ట్ ఆర్మ్ స్పిన్నర్ శ్రీ చరణి 4 వికెట్లతో లంక పతనాన్ని శాసించగా, దీప్తి శర్మ 3 వికెట్లతో రాణించింది. దీంతో శ్రీలంక జట్టు 20 ఓవర్లలో 111 పరుగులకే ఆలౌట్ అయింది.