తరుణ్ భాస్కర్, ఈషా రెబ్బా వినాయక చవితి పూజ.. లేటెస్ట్ ఫొటోతో పెళ్లి వార్తలకు బలం!

టాలీవుడ్ యువ దర్శకుడు, నటుడు తరుణ్ భాస్కర్, హీరోయిన్ ఈషా రెబ్బా త్వరలోనే పెళ్లి చేసుకోబోతున్నారంటూ వస్తున్న వార్తలకు మరోసారి బలం చేకూరింది. వినాయక చవితి పర్వదినం సందర్భంగా వీరిద్దరూ జంటగా పూజలో పాల్గొన్నారు. ఇందుకు సంబంధించిన ఫొటోను తరుణ్ భాస్కర్ తన ఇన్‌స్టాగ్రామ్ ఖాతాలో పంచుకున్నారు. దీంతో వీరి పెళ్లి వార్తలపై మరోసారి టాలీవుడ్‌లో జోరుగా చర్చ మొదలైంది.

గత కొంతకాలంగా తరుణ్ భాస్కర్, ఈషా రెబ్బా ప్రేమలో ఉన్నారని, త్వరలోనే ఒక్కటి కాబోతున్నారని ప్రచారం జరుగుతున్న విషయం తెలిసిందే. పలు సినిమా కార్యక్రమాలకు, ఈవెంట్లకు వీరిద్దరూ జంటగా హాజరవుతూనే ఉన్నారు. అంతేకాకుండా, తరుణ్ తల్లితో కలిసి ఈషా విమానాశ్రయాల్లో, షాపింగ్‌లో కనిపించడంతో ఈ ఊహాగానాలు మరింత బలపడ్డాయి. ఏఆర్ సంజీవ్ దర్శకత్వం వహించిన 'ఓం శాంతి శాంతి శాంతిః' చిత్రంలో తరుణ్, ఈషా జంటగా నటించారు. ఈ సినిమా చిత్రీకరణ సమయంలోనే వీరి మధ్య స్నేహం బలపడి, అది ప్రేమగా మారిందని ఇండస్ట్రీలో టాక్ నడుస్తోంది.

అయితే, ఇప్పటివరకు ఈ ప్రేమ, పెళ్లి వార్తలపై తరుణ్ గానీ, ఈషా గానీ నేరుగా స్పందించలేదు. గతంలో ఓ సందర్భంలో తరుణ్ భాస్కర్ మాట్లాడుతూ, ఈషా తనకు కేవలం స్నేహితురాలు మాత్రమే కాదని, తన బెస్ట్ ఫ్రెండ్స్‌లో ఒకరని పేర్కొన్నారు. సరైన సమయంలో అన్ని విషయాలు వెల్లడిస్తానని కూడా ఆయన తెలిపారు. ఇప్పుడు ఆయన ఇచ్చిన తాజా హింట్‌తో, ఆ సరైన సమయం ఆసన్నమైందని, త్వరలోనే ఈ జంట శుభవార్త చెబుతుందేమోనని అభిమానులు, నెటిజన్లు ఆసక్తిగా ఎదురుచూస్తున్నారు.

కాగా, తరుణ్ భాస్కర్ తాజా పోస్టుపై మంచు లక్ష్మి, ప్రగతి, శివాత్మిక, షాలిని కొండెపూడి వంటి తారలు స్పందించి విషెస్ చెప్పడం విశేషం.