నిజమైన మహిళా సాధికారత అంటే అదే: ఆర్ఎక్స్ఎస్ జెర్సీ ఆవిష్కరణ ఈవెంట్ లో రాయపాటి శైలజ

మహిళా క్రికెట్‌కు రోజురోజుకూ ఆదరణ పెరుగుతున్న తరుణంలో, వారికి కుటుంబం, సమాజం నుంచి మరింత ప్రోత్సాహం అవసరమని ఆంధ్రప్రదేశ్ రాష్ట్ర మహిళా కమిషన్ చైర్ పర్సన్ రాయపాటి శైలజ పిలుపునిచ్చారు. కడపలోని కేఎస్ఆర్ఎం ఇంజనీరింగ్ కళాశాలలో శనివారం సాయంత్రం జరిగిన ఆర్ఎక్స్ఎస్ (RXS) మహిళా క్రికెట్ జట్టు జెర్సీ ఆవిష్కరణ కార్యక్రమానికి ఆమె ముఖ్య అతిథిగా హాజరయ్యారు. ఈ వేడుకలో జట్టు బ్రాండ్ అంబాసిడర్, ప్రముఖ సినీ నటి నిధి అగర్వాల్ పాల్గొని ప్రత్యేక ఆకర్షణగా నిలిచారు.

ఈ సందర్భంగా రాయపాటి శైలజ మాట్లాడుతూ, మహిళా క్రికెట్‌కు గుర్తింపు లభించడం ఎంతో సంతోషాన్నిస్తోందన్నారు. ప్రతిభావంతులైన క్రీడాకారిణులను గుర్తించి, వారిని ఉన్నత స్థాయికి చేరేలా అండగా నిలవాలని సూచించారు. "ఒక అమ్మాయి తాను ఇష్టపడిన రంగంలో రాణించేలా ప్రోత్సహించి, చివరి వరకు తోడుగా నిలవడమే నిజమైన మహిళా సాధికారత" అని ఆమె వ్యాఖ్యానించారు. భవిష్యత్తులో ఆంధ్రప్రదేశ్‌కు చెందిన మరింత మంది క్రీడాకారిణులు భారత జాతీయ జట్టులో చోటు సంపాదించాలని మనస్ఫూర్తిగా ఆకాంక్షించారు. ఆర్ఎక్స్ఎస్ జట్టు మరిన్ని విజయాలు సాధించాలని ఆమె శుభాకాంక్షలు తెలిపారు.

ఈ కార్యక్రమంలో జట్టు బ్రాండ్ అంబాసిడర్ నిధి అగర్వాల్ సందడి చేశారు. ఆమె జెర్సీని ఆవిష్కరించి, జట్టు సభ్యులకు అభినందనలు తెలిపారు. "రాయలసీమ స్ఫూర్తి"ని ప్రతిబింబించేలా ఈ జెర్సీని రూపొందించినట్లు నిర్వాహకులు వెల్లడించారు. ఈ కార్యక్రమానికి విద్యార్థులు, క్రీడాభిమానులు పెద్ద సంఖ్యలో హాజరై, క్రీడాకారిణులను ఉత్సాహపరిచారు.