నటి అమీషా పటేల్ తల్లి ఇంట్లో చోరీ.. పనిమనిషి అరెస్ట్

ప్రముఖ బాలీవుడ్ నటి అమీషా పటేల్ కుటుంబంలో భారీ చోరీ జరిగింది. ముంబైలోని ఆమె తల్లిదండ్రుల నివాసంలో సుమారు రూ.5 లక్షల విలువైన బంగారం, వజ్రాభరణాలు దొంగతనానికి గురయ్యాయి. ఈ ఘటనపై కేసు నమోదు చేసుకున్న పోలీసులు, ఇంట్లో పనిచేస్తున్న సీమా ఘాటే (40) అనే పనిమనిషిని అరెస్ట్ చేశారు. నిందితురాలిని కోర్టులో హాజరుపరచగా, సెప్టెంబర్ 15 వరకు పోలీస్ కస్టడీకి అప్పగించారు.

ముంబై పోలీసుల కథనం ప్రకారం.. అమీషా పటేల్ తల్లి ఆశా పటేల్ ఇంట్లో సీమా ఘాటే గత ఏడాదిన్నరగా పనిమనిషిగా ఉంటోంది. ఈ ఏడాది జనవరిలో ఇంట్లోని ఒక బంగారు గాజును ఆమె దొంగిలించినట్లు ఆశా పటేల్ అనుమానించారు. గత ఐదారు నెలలుగా ఆమె సీమాను నిలదీస్తూ, నిజం ఒప్పుకుని నగలు తిరిగి ఇచ్చేయాలని కోరారు. అయితే, ఆమె ఎంతకీ అంగీకరించకపోవడంతో ఆశా పటేల్ చివరకు మెరైన్ డ్రైవ్ పోలీసులకు ఫిర్యాదు చేశారు.

ఆశా పటేల్ ఫిర్యాదు మేరకు, పోలీసులు భారతీయ న్యాయ సంహిత (బీఎన్ఎస్‌) సెక్షన్ 306 కింద కేసు నమోదు చేశారు. సాంకేతిక ఆధారాలతో విరార్‌లో నిందితురాలు సీమా ఘాటే ఆచూకీని గుర్తించి అదుపులోకి తీసుకున్నారు. ప్రస్తుతం నిందితురాలు పోలీసుల కస్టడీలో ఉంది. ఆమె నుంచి చోరీకి గురైన బంగారు గాజును స్వాధీనం చేసుకునేందుకు పోలీసులు ప్రయత్నిస్తున్నారు. అలాగే, ఆమెకు గతంలో నేర చరిత్ర ఏమైనా ఉందా? అనే కోణంలో కూడా విచారణ జరుపుతున్నారు. అయితే, దొంగిలించబడిన ఆభరణాలు ఇంకా లభ్యం కాలేదని పోలీసులు తెలిపారు.

ఇక, అమీషా పటేల్ విషయానికొస్తే.. 2000 సంవత్సరంలో ‘కహో నా ప్యార్ హై’ చిత్రంతో ఆమె సినీ రంగ ప్రవేశం చేశారు. ఆ తర్వాత ‘గదర్: ఏక్ ప్రేమ్ కథ’, ‘హమ్‌రాజ్’, ‘భూల్ భులయ్యా’ వంటి బ్లాక్‌బస్టర్ చిత్రాలతో స్టార్ హీరోయిన్‌గా ఎదిగారు. గతేడాది విడుదలైన ‘గదర్ 2’తో భారీ విజయాన్ని అందుకుని కెరీర్‌లో పునరాగమనం చేశారు. ఆమె చివరిగా ‘తౌబా తేరా జల్వా’ అనే చిత్రంలో కనిపించారు.