బ్యాంకులో సినిమా తరహా లూటీ.. సిబ్బందిపై కారం చల్లి డబ్బుతో పారిపోయిన వ్యక్తి.. వీడియో వైరల్‌!

నాగ్‌పూర్‌లో ఓ బ్యాంకులో సినిమా ఫక్కీలో దోపిడీ జరిగింది. ఓ ఆగంతకుడు స్టేట్ బ్యాంక్ ఆఫ్ ఇండియా (ఎస్‌బీఐ) బ్రాంచ్‌లోకి ప్రవేశించి, సిబ్బంది కళ్లలో కారం పొడి చల్లి సుమారు 4 లక్షల రూపాయల నగదుతో పరారయ్యాడు. అయితే, పోలీసులు అత్యంత వేగంగా స్పందించి కేవలం 30 నిమిషాల్లోనే నిందితుడిని పట్టుకుని, చోరీ సొత్తును పూర్తిగా స్వాధీనం చేసుకున్నారు.

వివరాల్లోకి వెళితే.. నిన్న‌ సాయంత్రం 6 గంటల సమయంలో ఈ ఘటన చోటుచేసుకుంది. నగరంలోని ఎస్‌బీఐ బ్రాంచ్‌లోకి ముఖానికి గుడ్డ చుట్టుకుని, ఎర్రటి కుర్తా, నల్ల పైజామా ధరించిన ఓ వ్యక్తి ప్రవేశించాడు. నేరుగా క్యాష్ కౌంటర్ వద్దకు వెళ్లి, అక్కడి ఉద్యోగుల కళ్లలోకి కారం పొడి విసిరాడు. 

దీంతో వారు తీవ్రమైన మంటతో బాధపడుతూ ఏమీ చేయలేని స్థితిలోకి వెళ్లారు. బ్యాంకులో ఒక్కసారిగా గందరగోళం నెలకొంది. ఇదే అదనుగా భావించిన నిందితుడు, కౌంటర్‌లోని నగదును చేజిక్కించుకుని అక్కడి నుంచి వేగంగా బయటకు పారిపోయాడు.

వెంటనే తేరుకున్న బ్యాంకు సిబ్బంది, సెక్యూరిటీ గార్డు నిందితుడిని పట్టుకునేందుకు వెంబడించినా ఫలితం లేకపోయింది. సమాచారం అందుకున్న పోలీసులు వెంటనే రంగంలోకి దిగారు. బ్యాంకు లోపల, బయట ఉన్న సీసీటీవీ ఫుటేజీని క్షుణ్ణంగా పరిశీలించారు. నిందితుడి రూపాన్ని, అతను పారిపోయిన దిశను గుర్తించారు. వెంటనే నగరవ్యాప్తంగా కీలక ప్రాంతాల్లో చెక్‌పోస్టులు ఏర్పాటు చేసి, పెట్రోలింగ్ బృందాలను అప్రమత్తం చేశారు. ఈ సమన్వయ ఆపరేషన్ ఫలించి, కొద్దిసేపటికే నిందితుడిని గుర్తించి అదుపులోకి తీసుకున్నారు.

నిందితుడిని నాగ్‌పూర్ రూరల్ పరిధిలోని భివాపూర్ తహసీల్‌కు చెందిన 28 ఏళ్ల సూరజ్ బోర్కర్‌గా గుర్తించారు. అతను బీఎస్సీ గ్రాడ్యుయేట్ అని, ప్రస్తుతం నిరుద్యోగిగా ఉన్నాడని పోలీసులు తెలిపారు. అతని వద్ద నుంచి చోరీకి గురైన మొత్తం 4 లక్షల రూపాయల నగదును స్వాధీనం చేసుకున్నట్లు వెల్లడించారు. 

ఈ దోపిడీకి పాల్పడటానికి గల కారణాలపై సూరజ్‌ను విచారిస్తున్నామని, కేసుపై తదుపరి దర్యాప్తు కొనసాగుతోందని అధికారులు వివరించారు. దోపిడీ జరిగిన అరగంటలోనే నిందితుడిని పట్టుకోవడం పట్ల పోలీసుల పనితీరుపై ప్రశంసలు వ్యక్తమవుతున్నాయి.