బంగాళాఖాతంలో అల్పపీడనం.. ఉత్తరాంధ్రకు భారీ వర్ష సూచన

బంగాళాఖాతంలో ఏర్పడిన అల్పపీడన ప్రభావంతో ఉత్తరాంధ్రలో నేడు, రేపు (శుక్ర, శనివారాలు) తేలికపాటి నుంచి మోస్తరు, కొన్ని చోట్ల భారీ వర్షాలు కురుస్తాయని రాష్ట్ర విపత్తుల నిర్వహణ సంస్థ (ఏపీఎస్‌డీఎంఏ), వాతావరణ శాఖ వెల్లడించాయి. ప్రజలు అప్రమత్తంగా ఉండాలని అధికారులు సూచించారు.

గురువారం తెల్లవారుజామున ఉత్తర బంగాళాఖాతంలో ఏర్పడిన ఉపరితల ఆవర్తన ప్రభావంతో ఈ అల్పపీడనం ఏర్పడింది. దీనికి అనుబంధంగా 9.4 కిలోమీటర్ల ఎత్తు వరకు సైక్లోనిక్ సర్క్యులేషన్ విస్తరించి ఉన్నట్లు భారత వాతావరణ శాఖ (ఐఎండీ) తెలిపింది. ఈ వ్యవస్థ క్రమంగా బలపడుతూ ఆంధ్రప్రదేశ్ తీరం వైపు కదులుతున్నట్లు పేర్కొంది.

దీని ప్రభావంతో శుక్ర, శనివారాల్లో శ్రీకాకుళం, విజయనగరం, పార్వతీపురం మన్యం, అల్లూరి సీతారామరాజు జిల్లాల్లో ఉరుములు, మెరుపులతో కూడిన మోస్తరు నుంచి భారీ వర్షాలు కురిసే అవకాశం ఉంది. విశాఖపట్నం, అనకాపల్లి, కాకినాడ, కోనసీమ, పశ్చిమ గోదావరి, కృష్ణా జిల్లాల్లోనూ తేలికపాటి నుంచి మోస్తరు వర్షాలు పడతాయని అధికారులు అంచనా వేస్తున్నారు.

మత్స్యకారులకు హెచ్చరిక
తీర ప్రాంతాల్లో గంటకు 40 నుంచి 50 కిలోమీటర్ల వేగంతో ఈదురుగాలులు వీస్తాయని, కొన్నిసార్లు గరిష్ఠంగా 60 కిలోమీటర్ల వేగాన్ని అందుకోవచ్చని హెచ్చరించారు. సముద్రం అల్లకల్లోలంగా ఉంటుందని, అలలు ఎగసిపడతాయని తెలిపారు. ఈ నేపథ్యంలో రానున్న 48 గంటల పాటు మత్స్యకారులు వేటకు వెళ్లవద్దని ఏపీఎస్‌డీఎంఏ స్పష్టం చేసింది. ఇప్పటికే సముద్రంలో ఉన్నవారు వెంటనే తీరానికి తిరిగి రావాలని సూచించింది.

ఇప్పటికే ఈ అల్పపీడన ప్రభావం రాష్ట్రంలోని కొన్ని ప్రాంతాల్లో కనిపిస్తోంది. గురువారం అనకాపల్లి జిల్లాలోని పలు ప్రాంతాల్లో భారీ వర్షం కురిసింది. దార్లపూడిలో 3.7 సెం.మీ, పరవాడలో 3.4 సెం.మీ వర్షపాతం నమోదైంది. పిడుగులు పడే ప్రమాదం ఉన్నందున వర్షం సమయంలో ప్రజలు చెట్లు, విద్యుత్ స్తంభాల కింద ఉండరాదని అధికారులు హెచ్చరిస్తున్నారు. పరిస్థితిని పర్యవేక్షించేందుకు ఏపీఎస్‌డీఎంఏ కంట్రోల్ రూమ్‌ ఏర్పాటు చేసింది.